Тринаесетгодишен Британец стана татко

Ова е среќното семејство

Двајца малолетници од Велика Британија, 13-годишниот Алфи Патен и неговата девојка, 15-годишната Сантел Стидман, станаа родители откако пред четири дена добија ќерка.

Породувањето е извршено во болницата во англискиот град Истборн, во областа Источен Сасекс и според објаснувањето на лекарите, мајката и нејзиното бебе се сосема добри.

Како што јави дописникот на МИА од Лондон, таткото кој се уште е само ученик, висок околу 130 сантиметри и изгледа многу помлад и помал дури и за своите години, изјави дека е „добро да се има бебе“.

Тој сепак признава дека не размислувал за тоа како ќе го издржува и ќе го подигнува своето дете.

„Немам ништо во џебот, зашто татко ми понекогаш ми дава за џепарлок по 10 фунти“, им изјави малолетниот татко Патен на новинарите.


Тринаесетгодишниот татко живее во Истборн сам со својата мајка и имал само 12 години кога е зачнато бебето. Двајцата малолетници, сега родители, од почетокот ја имале поддршката на нивните родители, кои се согласиле малолетничката да ја зачува бременоста и да го роди бебето, без разлика што двајцата млади имаат толку малку години и се уште се само ученици.

Малолетната мајка и нејзината штотуку родена ќерка се отпуштени од болницата и тие сега се заедно со нејзиното семејство, живеејќи во ќука што е сопственост на општината во Истборн за која не се плаќа никаква наемнина.