Фан клуб Барселона

Шпанскиот и европскиот шампион Барселона е на прагот да ја освои својата прва титула сезонава. Во првиот натпревар од Суперкупот на Шпанија Барса славеше со 2:1 во Билбао.

Билбао кој лани изгуби во финалето на кралискиот куп токму од Барселона со 4:1 сега први го отворија натпреварот преку голот на Оскар де Маркос во 44-та минута.

Во вториот дел Барса изедначи преку Чави во 58-та минута, а Педрито со голот во 68-та минута го постави конечниот резултат.

Во тимот од Блауграна го немаше новото засилување Златан Ибрахимовиќ, а исто од овој натпревар не беа дел и Лео Меси и Андерс Иниеста поради повреди. Во нападот играа Педро, Кркиќ и Анри.

“Многу сум задоволен од настапот на Педро. Тој ќе игра голема улога во тимот оваа сезона. навистина работеше напорно и е доста мотивиран.“ - изјави Пеп Гвардиола по натпреварот.

Европскиот шампион Барселона се подготвува да испрати понуда до Манчестер Јунајтед за српскиот дефанзивец Немања Видиќ. Откако пропаднаа преговорите за трансфер на одбранбениот фудбалер на Шахтјор, Димитриј Чигрински, шампионот на Шпанија ќе се сврти кон најдобриот играч во Премиер-лигата за минатата сезона, пишува Дејли Мирор.

Се очекува менаџерот на Јунајтед, Алекс Фергусон, да не го продаде Видиќ, кој заедно со Рио Фердинанд се едни од најголемите дефанзивни двојки во светот. Доколку понудата биде одбиена Барселона ќе се обиде повторно да го ангажира во јануарскиот преоден рок. Сумата која ќе ја понуди шпанскиот клуб не е наведена.

Уште еден податок би можел да оди во корист на "Каталонците" за реализација на трансферот. Имено, сопругата на Видиќ, Ана, е наводно незадоволна од престојот во Манчестер па би можела да го наговори Србинот да се пресели во Шпанија.

Сепак, ова се само шпекулации, а дали Барса ќе успее да донесе уште едно големо име по Ибрахимовиќ, останува да покаже времето.

Видиќ во Манчестер дојде во јануари 2006 година за седум милиони фунти од Спартак Москва и преку игрите во изминатите три години се промовираше во еден од најдобрите одбранбени фудбалери во светот.

"Каталонците" се свртеа кон Риера

Откако пропаднаа обидите за ангажирање на Цеск Фабрегас и Хуан Мата, управата на Барселона се сврте кон уште еден шпански репрезентативец, 27-годишниот Алберт Риера. Фудбалерот на Ливерпул полека прераснува во еден од најдобрите крилни фудбалери во Премиер-лигата па токму Барселона посакува да ги осигура неговите услуги.

"Имаме потреба од крилен фудбалер и имаме намера да потпишеме со некого до крајот на преодниот рок. Точно е дека го следиме Риера. Тој поседува квалитет и ги разгледуваме можностите тој да се пресели на Ноу Камп", изјави спортскиот директор на клубот, Чики Бегиристаин.