Македонска Енциклопедија

Апсурди во Енциклопедијата - за Тоше само десетина редови

Сашка Цветковска

„Евровизија“ како најголем успех!?

Неколку штури информации во десетина реда - вака е опишан пејачот околу чија музика и енергија се обединуваа милиони фанови на тензичниот Балкан.

Академиците процениле дека за музичката легенда Проески е доволно да набројат неколку песни и да му ја издвојат „Евровизија“ како негов најголем успех(!!!).

Но, ако за Тоше Проески се штеделе зборови, не се штедело на простор за некои приватни фирми. Па така, за извесни „Завар Компани“ и „Берко - Велес“ напишале колку за Тоше.

За него напишале кус ин мемориам, а за нив пофалби за бизнисот. Имале огромни простории и вовеле ИСО стандарди, а и со извозот добро стоеле. Со што го заслужиле своето место во енциклопедијата, одговор нема.

И додека едни се рекламираат, други не се ни споменуваат. Па така, нема ниту збор за музичките легенди Леб и Сол. Ја заборавиле и Кинотеката на Македонија. А место не се нашло ниту за фестивалот „Браќа Манаки“.

Проески - човекот кој обедини милиони луѓе

Но, во споредба со нив, добро поминале Војдан Чернодрински и Петре Прличко. Ним им ги дале заслужените десетина реда.

Затоа пак, најголемо разбирање академиците имале за ликот и делото на политичарите. Најпочестен останува Премиерот. Со цела страница и две огромни фотографии.

За едни мајка, за други маќеа, енциклопедијата продолжува да предизвикува контроверзии. А за уметноста има две опции, да се чека реиздание или да се остави на времето само да го потврди нејзиното место.