Рецепт: Тарт со Нутела и лешници

Доколку сте љубители на Нутела (а таквите ги има многу), овој колач ќе ги надмине дури и вашите големи очекувања. Комбинацијата на чоколадо, лешници и нутела навистина е тешко да се погреши, па затоа овој колач ќе стане вашиот омилен десерт. Рецептот е едноставен и се приготвува лесно. Да почнеме.

Потребни состојки

Тесто:

- 140 гр. путер на собна температура;
- 75 гр. шеќер во прав;
- 1 кесичка ванилин шеќер;
- 50 гр. бланширани и мелени бадеми;
- малку сол;
- 1 јајце;
- 245 гр. брашно.

Фил:

- 200 гр. Нутела;
- 140 гр. чоколадо;
- 200 гр. путер;
- 1 јајце;
- 2 жолчки;
- 2 лажици шеќер во прав;
- 140 гр. лешници, исецкани на парчиња.

Подготовка

Со миксер матете го путерот и полека додадете му го најпрво шеќерот, потоа бадемите, солта, шеќерот во прав и јајцето. Матете со миксерот со умерена брзина и полека додадете го и брашното. Изматете уште малку, обликувајте ја смесата во форма на топка и ставете ја во фрижидер да отстои најмалку два часа.

Обложете го калапот со хартија за печење и во него распоредете го тестото. Избоцкајте го со виљушка и печете го 25 минути на 180 степени.

Извадете го тестото од рерна и оставете го да се олади. Откога ќе стане млако, премачкајте го со Нутела.

Посебно растопете го путерот, а посебно чоколадото, на пареа. Во стопеното, но не врело чоколадо, измешајте го со лажица најпрво целото јајце, а потоа една по една жолчка. Додадете го шеќерот и на крај растопениот путер. Смесата полијте ја врз тестото премачкано со Нутела и одозгора попрскајте ги сецканите лешници.

Печете ја тортата на 190 степени, околу 12 минути. Готовата торта чувајте ја на собна температура. Уживајте!

Вкусна и домашна чоколадна алва

Постојано дома се туфкаме и размислуваме што да си направиме нешто вкусно и благо, но сепак да биде брзо и лесно. Ние ви нудиме интересен и брз рецепт за домашна чоколадна алва, која секогаш може да ја задоволи вашата желба за благо.

Потребни состојки:

1 шолја (за кафе) вода

2 шолји масло

6 шолји брашно

6 шолји шеќер

1 шолја чоколадо во прав или какао

По желба можете да додадете лешници, ореви и бадеми

Подготовка:

Во подлабок сад ставете го маслото, водата и шеќерот и потоа оставете ги да се варат. Брашното измешајте го со чоколадото во прав, или какаото. Кога шеќерот ќе се стопи и смесата ќе зоврие, додадете го брашното со какаото и полека мешајте.

Мешајте неколку минути додека смесата не се изедначи. Додадете ги лешниците или пак останатото јаткасто овошје и тргнете ја смесата од оган.

Кога малку ќе се излади, алвата исечете ја на коцки. Декорирањето го оставаме на вашата фантазија.

Пријатен апетит.

Лесен десерт: Секс во тавче

Вкусен десерт кој иако има неколку слоја фил се приготвува многу лесно. Благодарение на кората и крем сирењето многу наликува на cheese cake и едноставно се топи во вашата уста. Се нарекува „Секс во тавче“ поради богатиот кремаст вкус на кој не може да останете рамнодушни.

Потребни состојки за кората:

200 грама сецкани ореви

3 големи лажици шеќер

100 грама стопен путер

200 грама брашно

Потребни состојки за филот со крем сирење:

400 грама крем сирење

200 грама шеќер во прав

200 грама изматена хопла

Темен фил:

1 пудинг од чоколадо приготвен по упатството

Светол фил:

1 пудинг од ванила приготвен по упатството

Најгорен слој:

300 мл изматена хопла

Рендано чоколадо

Начин на пригодување:

Најпрвин загрејте ја рерната на температура од 180 степени. Изберете правоаголен сад за печење со димензии 30 на 15 см. Премачкајте го садот со путер или пак едноставно обложете го со хартија за печење.

Убаво измешајте ги сите состојки кои ви се потребни за кората, а потоа содржината која што сте ја добиле рамномерно натапкајте ја во садот. Печете од 15 до 20 минути во зависност од тоа како ви пече рерната. Откако сте ја испекле кората оставете ја малку да се олади и во меѓувреме започнете со подготовка на филовите.

Во пластичен сад измешајте ги крем сирењето, шеќерот во прав и изматената хопла. Вклучете го миксерот и матете додека не добиете лесна и пенеста смеса. На страна пригответе ги двата пудинга по упатството.

Откако сте ја оладиле кората врз неа нанесете го рамномерно филмот од крем сирење. Врз него ставете го пудингот од чоколадо, па потоа пудингот од ванила. За најгорниот слој изматете ја хоплата и украсете со ренданото чоколадо.

Совет плус: редете ги филовите во подлабок сад и служете го десертот ладен 

Брзи и вкусни домашни тулумби

Откако понудивме неколку рецепти за вкусни торти и колачи, дојде време за тулумбата, еден од балканските најдобри и најслатки десерти. Специфичниот сладок вкус е омилен од многумина кои живеат не само на Балканот.

Состојки за тестото:

400 милилитри вода

6 лажици масло

250 грама брашно

5 јајца


Состојки за шербетот:

800 грама шеќер

400 милилитри вода

1 лимон исечен на парчиња

Подготовка:

Во лонец од средна големина загрејте вода. Кога водата ќе зоврие, полека додадете го брашното со постојано мешање, додека смесата не се згусне и започне да се одвојува од лонецот. Тргнете го садот од огин и оставете малку смесата да се олади на собна температура. Во изладената смеса додадете едно по едно јајце, а притоа мешајте со раце.

За подготовка на шербетот варете вода и шеќер на висока температура додека шеќерот не се растопи, а за крај додадете го лимонот и оставете шербетот да се олади на собна температура.

Потоа загрејте масло на висока температура, а со помош на шприц за декорирање истискајте ја претходно подготвената смеса во вид на тулумба. Во топлото масло тулумбите сами ќе се завртат. Кога ќе добијат златно жолта боја извадете ги, а потоа ставете ги со ладниот шербет. Кога сите тулумби ќе бидат готови, полијте ги со остатокот од ладниот шербет и ставете ги во фрижидер за да се оладат пред послужување.

Пијана торта

Портокалов мафин