БИЗНИС ВЕСТИ, НОВОСТИ, ИНФОРМАЦИИ...

Најголем рудник на бакар во Југоисточна Европа ќе никне на јужната страна на планината Огражден кај Струмица, над селото Иловица.

Четиригодишните истражувања што ги започна компанијата „Фелпс Доџ“, а ги продолжи „Припорт Макморан “ од САД со компанијата „Крајзберг“ од Малезија, покажале дека на овој терен постојат резерви од 303 милиони тони бакарна руда и 110 милиони тони златоносна руда со содржина на злато од 0,3% во тон руда.

Оваа исклучително надежна приказна за македонската економија се очекува да продолжи, бидејќи истрагите, кои моментално се стопирани, ќе потраат уште најмалку од две до четири години, период во кој е предвидено да се заврши целокупниот процес на утврдување на рудните резерви на ова подрачје, пишува весникот.

Наведените компании вршат истражни геолошки работи и на теренот Кадиица над Пехчево, каде што биле утврдени значајни резерви на бакар и на други метали.

Двете компании, кои ги водат истражувањата, поседуваат вкупно 15 рудници, меѓу кои е и најголемиот рудник на бакар во светот, кој се наоѓа во Малезија.

Дали тие, откако ќе се комплетира геолошката слика за резервите на бакар и злато на двете спомнати локации во Македонија, ќе се одлучат во Струмичко да градат и рудник, засега не е познато, пишува „Утрински весник“.

Пријавување данок до 15 март

На граѓаните им остануваат уште четири недели за да пријават колку приходи оствариле во минатата година.

- Ги повикуваме граѓаните да ја исполнат обврската навремено за да не се создаваат метежи во даночните канцеларии - велат во УЈП.

Овој данок го плаќаат сите граѓани што приходите ги оствариле во земјата и во странство.

Персоналниот данок на доход се плаќа еднаш годишно за сите нето-приходите што граѓанинот ги имал во претходната година, освен за тие што се изземени од оданочување. Даночната стапка е 10%.

Цената на парното во Скопје од 1 јануари се намалува за 35,94%. Одлуката ја донесе Регулаторната комисија за енергетика денеска на подготвителна седница. Врз основа на направените анализи Регулаторната комисија утврди дека просечна цена на топлинската енергија за греење испорачана од страна на Топлификација АД Скопје за 2009 година на праг на корисник изнесува 2,8542 денари за киловатчас.

Нафтата под 37 долари за барел

Цената на нафтата денеска на берзата во Њујорк е под 37 долари за барел - најниско ниво во последните три недели, иако се појавија нови показатели за успорување на светскиот економски раст, кои резултираат со се полоши очекувања за побарувачка на тој енергенс.

Цената на американската „лесна“ нафта за терминска испорака во февруари денеска на Њујоршката трговска берза се намали за 1,15 долари, на 36,44 долари за барел, додека европската „брент“ нафта на Меѓународната берза во Лондон во исто време поевтини за 72 центи на 42,19 долари за барел.

Нафтата на берзата во Њујорк само минатата недела изгуби на вредност речиси 15 долари за барел и претпладнето достигна минимум од 36,10 долари за барел.

Тој енергенс моментно е 110 долари поевтин во однос на рекордната цена од 147,27 долари за барел од јули.