Вистина или фарса - Реформите во здравството

Директорката го бара кртот на Клиниката за онкологија

Дознаваме дека в.д. директорката истражувала меѓу вработените кој ја издал веста

Јасмина Јовановска

На Клиниката за онкологија и радиологија се бара кртот кој во јавноста открил дека на вработените во оваа здравствена установа пред дваесетина дена им беа поделени вишоци од парите заработени од лекување приватни пациенти. В.д. директорката на клиниката, д-р Симонида Црвенкова, како што дознаваме, спровела истрага меѓу вработените за да утврди кој е тој што ја издал веста во јавноста дека делела екстра-пари. На тапет најмногу биле вработените од сметководство.

Истрагата се одвивала во неколку фази. Прво, како што велат неофицијални клинички извори, директорката ги повикала сметководителите да дадат писмена изјава дека тие не се кодошот што ја изнел информацијата во јавноста. Неделава настапила втората фаза од истрагата - сметководителите биле повикани на сослушување во канцеларијата на директорката. Добрите познавачи на состојбите на клиниката, велат дека испрашувањето се одвивало во присуство на претставници од Синдикатот и адвокатот кој е ангажиран на клиниката, небаре била откриена деловна тајна, па виновниците мора да бидат казнети. Од Синдикатот на клиниките потврдија дека на Клиниката за онкологија имало истрага, но не сакаа многу да коментираат. Дека истрага се вршела потврди и в.д. директорката Црвенкова. Така и' било сугерирано од правниците, вели Црвенкова, која не сакаше понатаму многу да објаснува, со образложение дека тоа е интерна работа на клиниката.

Министерот за здравство, Бујар Османи, исто така, многу не сакаше да коментира за делењето екстра-пари на Онкологија заработени од приватни пациенти во услови кога нашите осигуреници се принудени да чекаат и по два месеца за зрачење. Тој само рече дека на Онкологија неделава е пуштена инспекција и додека не биде завршена, не може ништо да коментира.

Од екстра-заработувачката на Клиниката за онкологија, пред се', од косовските пациенти, како што веќе пишуваше „Утрински весник“, најмногу се офајди директорката, и тоа околу 120.000 денари. Пари беа поделени меѓу речиси сите вработени, па така по околу 7.000 денари добија и вратарот и к*рирот. Од парите од приватни пациенти, според исплатната листа, добија и тројцата надворешни членови на Управниот одбор на клиниката, и тоа вкупно 60.000 денари.

И додека директорката го бара предавникот за информација што им била достапна на речиси сите вработени, на клиниката повторно нема одредени цитостатици за простата, карцином на кожа. На македонските пациенти за зрачење им се закажува отсега за во јуни.