Dave’s Kitchen: Вкусен куглоф брз и лесен за подготовка

Искористете го продолжениот викенд за да приготвите лесен и вкусен десерт за своето семејство и пријателите.

Потребни состојки:

• 250 гр путер
• 2 шолји шеќер
• 6 јајца
• 1 лажичка екстракт од ванила
• 2 ½ шолји брашно
• 1 лажичка сода бикарбона
• Прстофат сол
• 1 шолја кисела павлака
• 100 гр чоколадо

За чоколадниот прелив:

• 70 мл слатка павлака
• 150 гр чоколадо

Начин на подготовка:

Во миксер измешајте ги путерот и шеќерот, матете околу 5-6 минути додека путерот не се соедини со шеќерот и не стане пенест. Едно по едно се додаваат 6-те јајца, екстрактот од ванила, брашното, сода бикарбона и прстофат сол. Брашното додавајте го на два пати, а не цело одеднаш и на крајот додека матите додадете ја киселата павлака. 

Добиената изматена смеса претурете ја во два сада по половина во секој сад. Во едниот сад додадете 100 гр. растопено чоколадо.

Од смесите истовремено се става во подмачкан куглоф со путер и со нож се прават нежни кружни движења. Се пече околу 45 минути на 170 степени. 

Кога ќе биде комплетно изладен се прелива со чоколаден прелив кој можете да го подготвите на следниов начин: 

Во тавче на оган ставете да се загрее слатка павлака и кога убаво ќе се вжешти додадете ги парчињата чоколадо. Измешајте убаво додека не се растопи комплетно чоколадото и одозгора на куглофот нанесете од чоколадната глазура. Декорирајте со исечкани ореви.

Чоко „лист“ торта

„Лист“ тортите се ретро десерт што моментално го има своето заживување. Тортите моментално се гастрономски тренд, а причината за преродбата е едноставноста во подготвувањето.

Состојки за тестото:

• 248 грама брашно
• 310 грама шеќер
• 1 прашок за пециво
• ¼ лажичка сол
• 226 грама несолен путер
• 50 грама какао
• 235 мл врела зовриена вода
• 120 мл. млеко
• 2 јајца
• 2 лажички ванила екстракт

Состојки за чоколадната глазура:

• 112 грама несолен путер
• 30 грама какао
• 6 лажици млеко
• 400 грама шеќер во прав
• Чоколадни мрвици
  

Начин на подготовка:

Загрејте ја рерната на 180 степени  и намрсете го правоаголниот плех со путер или обложете го со хартија за печење.

Во подлабок сад ставете го брашното, прашокот за пециво, шеќерот и солта и оставете го садот на страна. Во друг поголем сад стопете го путерот на пареа (или во микробранова) па додадете ги какаото и водата. Добро промешајте додека не се олади малку смесата. Потоа додадете ги млекото,јајцата и ванила екстрактот, а потоа оваа смеса измешајте ја со таа од првиот сад со брашното. Добро промешајте и смесата истурете ја во плехот и печете околу 25 минути. Кога ќе се испече оставете да се олади.

Во поголем сад стопете го путерот, какаото, млекото а потоа додадете го шеќерот во прав додека не добиете течна чоколадна глазура.

Оставете глазурата да се олади и потоа прелијте ја врз испеченото тесто. По желба ставете чоколадни мрвици, или некое сезонско овошје, а ако не сакате оставете ја како што е.

Dave’s Kitchen: Опера колачи

Ова се колачи за кои важи онаа народната „прсти да излижеш“. Можеби малку ќе се помачите додека ги приготвите, но верувајте дека вреди.

Потребни состојки за пандишпанот:

• 5 белки
• 50 гр. шеќер во прав
• 250 гр. мелени бадеми
• 250 гр. шеќер во прав
• 80 гр. брашно
• 5 јајца
• 50 гр растопен путер

Со помош на миксер изматете ги белките, постепено додавајќи ги 50-те грама шеќер додека не добиете цврста пена. 

Во друг сад на страна изматете ги преостанатите состојки, не додавајќи ги една по една туку сите одеднаш. На крајот кога смесата ќе биде добро изматена додадете 50 грама растопен путер и спојте ја со претходно приготвената пена.

Смесата поделете ја подеднакво во две правоаголни големи тавчиња обложени со хартија и печете на температура од 200 степени околу 10-тина минути додека не добие убаво златна кафена боја.

Кога пандишпаните ќе бидат готови од едната страна премачкајте ги со растопено чоколадо и ставете ги во ладилник да се стегнат околу 10-15 минути.

Во меѓувреме пригответе ги филовите.

Фил со кафе

Потребни состојки:

• 150 мл. млеко
• 50 гр. шеќер
• 3 жолчки
• 50 гр. шеќер
• 180 гр путер
• 2 лажици еспресо

Најпрвин ставете ги млекото и шеќерот на оган и мешајте додека млекото не дојде до точка на вриење. На страна изматете ги јајцата и преостанатиот шеќер и додадете ги во жешкото млеко притоа матејќи со маталка. Откако смесата ќе дојде до вриење накратко оставете ја малку да се излади, па префрлате ја во миксер. Додадете го еспресото и миксајте додека не добиете хомогена смеса. Откако филот потполно ќе се излади додадете го омекнатиот путер и повторно миксирајте додека убаво не се соедини.

Чоколаден фил

Потребни состојки:

• 150 гр. чоколада за готвење
• 100 мл слатка павлака
• 2 лажици мед
• 3 лажици путер

Во сад на пареа растопете ги сите состојки додека не се соединат. Оставете филот да се стегне на собна температура.

Откако сте ги приготвиле филовите време е за редење на колачите. 

Прво поделете ги корите на 2 дела, така што ќе добиете 4 подеднакви делови. Ставете ја првата кора и врз неа нанесете1/2 од кафе филот. Потоа ставете ја втората кора и врз неа ставете го целиот чоколаден фил. Врз неа следи редењето на третата кора и мачкање на преостанатиот дел од белиот фил. Потоа оставете да се стегне околу 1 час во ладилник. 

На крајот прелијте со чоколадна глазура приготвена од 250 гр. чоколадо за готвење, 100 мл слатка павлака и 5 лажици путер растопени на пареа. Прелијте ја низ целата површина врз последниот слој од бел фил и оставете да се стегне.

Од оваа доза би требало да ви излезат околу 20 -тина парчиња.

КОЛАЧ СО ГАЗОЗА И ВИШНИ - ОВА НЕ СЕ ПРОПУШТА

Dave’s Kitchen: Рецепт за вкусни француски макаронс

Денес од кујната на Давор го презентираме рецептот за еден од најбараните десерти во моментот. Иако се специфични за правење француските макаронс, сепак не се невозможна мисија.

Потребни состојки:

• 3 белки
• 1/3 од шолја шеќер
• 1 шолја мелени бадеми (ситно измелени како брашно)
• 1 1/3 шолја шеќер во прав
• 2 лажици еспресо

* Големината на шолјата со која ќе ги мерите состојките е од 100 мл.

Начин на подготовка: 

Во сад за матење ставете ги белките и започнете да матите. Кога ќе се формира почетна пена пополека додавајте го шеќерот и продолжете да матите на најголемата брзина (шеќерот додавајте го постепено). Потребно е да матите околу 7 минути за да добиете цврст шлаг. 

Во сад на страна низ сито поминете ги шеќерот во прав, еспресото и мелените бадеми. (Овој чекор е многу важен за да Ви излезат добро колачињата). 

Во садот со изматените белки додадете ги пресеаните бадеми,еспресото и шеќерот во прав и со помош на шпатула мешајте пополека не дозволувајќи брзо да се изгуби воздухот во смесата. Постепено промешувајте и проверувајте ја смесата на тој начин што со шпатулата ќе земете и ќе гледате како паѓа. Треба да паѓа постепено како лава.

Ставете ја смесата во готварски шприц и формирајте ги колачињата во мали кругчиња. Кога ќе го исполните тавчето исто така важен чекор (доколку не го направите, нема да ја добиете посакуваната форма) е благо да го удрите тавчето по еднаш на работната маса од сите страни. Овој чекор помага да излезе воздухот од колачињата и токму поради ова ќе се формира пукнатината на колачето (стапало). 

Оставете ги 40-тина минути да се исушат на собна температура (во зависност од влажноста на воздухот понекогаш и до 1 час). Кога ќе ги допрете со прстот треба да бидат засушени. 

Загрејте ја рерната на 140 степени и печете ги 13-15 минути.

Потребни состојки за филот:

• 120 гр. путер на собна температура
• 120 гр. шеќер во прав
• Екстракт од ванила

Сите состојки ставете ги во миксер и матете околу 7 минути додека не добиете убава пенлива смеса. Филот ставете во готварски шприц и нанесете врз едно колаче од долната страна, со друго поклопете го филот и ќе добиете сендвич колаче - макаронс.

ТОРТА ОД МАЛИНИ И ЧОКОЛАДО