Убиен Осама Бин Ладен

Со спектакуларната акција и убивањето на Осама Бин Ладен, водачот на терористичката група Ал-Каеда, припадниците на специјализираната единица на американската војска "Navy Seals"(Морски Фоки), станаа новите американски херои, кои наскоро, познавајќи ја американската кинематографија, ќе бидат овековечени во бројни акциони филмови.

"Фоките" своите први акции ги изведувале уште во времето на Втората светска војна, по што станале елитна единица која е задолжена за изведување на најсложените операции.

Тајната операција за елиминирање на Осама Бин Ладен е уште еден триумф за "најтивките американски убијци", прекар кој го добија од американските медиуми.

"Фоките" се задолжени за најделикатните воени акции на море, воздух и земја.

Тие се оспособени за соочување со непријателот лице во лице, што го потврди и акцијата во Пакистан, кога го погледнале Бин Ладен во очи пред да го убијат со два прецизни истрели.

И досега "Фоките" важеа за полулегендарна единица, сочинета од војници кои пијат змиски отров и ги убиваат своите непријатели со гризнување на образот, нешто за кое говореа поранешните припадници.

Тренингот за влез во единицата трае две години, колку што трае и обуката за астронаутите. Младите војници за крајот на обуката се почестуваат со "пеколната недела", симулација на борба, пукање, бомби и тест за издржливост.

Единицата моментално брои околу 2.500 припадници распоредени во мисии ширум светот, кои се држат во строга тајност. Најдобрите од нив се избираат за во "Seal Team Six", одделот кој учествуваше во акцијата за убивање на Бин Ладен.