Средношколец убиен во училишен двор

Убиен е средношколец во училишен двор. Со метална шипка удрен е директно во глава. Го тепале двајца, засега се уште непознати за полицијата.

Крвавата тепачка се случи попладнево на самиот влез од градежното скопско училиште „Здравко Цветковски“ во населбата Карпош.

Убиен е 18-годишниот Мухамед Али Јашари од Кондово, излегол да ја спречи тепачката во која цел на насилниците бил неговиот соученик 17-годишниот Дарко, кој пак од удар со бекатон плочка лежел во бессознание на плочникот пред влезната врата од зградата, силните удари со металните шипки во главата за Мухамед биле смртоносни.

Реагирало и обезбедувањето на училиштето но попусто. Лекарите успеале да ги санираат повредите кај 17-годишниот средношколец.

Полицијата пладнево вршеше увид во градежното училиште, металните шипки со кои бил убиен Мухамед не ги најдоа во дворот.

Со полициска трака беше одбележано местото каде се случило крвавото убиство. Додека траеше распитот во „Здравко Цветковски“, директорката на училиштето вешто ги избегна новинарите, брзаше на прес конференција во Град Скопје, кај министерот за образование Никола Тодоров и градоначалникот Коце Трајановски.

Но таму, ниту одговорност ниту одговори за новинарите.

Не е прв пат ученици да се пресметуваат со ножеви, метални шипки и камења. Се почесто баналните расправии меѓу учениците завршуваат со пукнати глави и слепоочници или избодени со ножови.

Денеска Мухамед само сакаше да му помогне на својот другар. Неодговорноста на општеството ја плати со живот.