Албанците масовно заминуват на печалба

Повеќе од загрижувачка е состојбата со илегалната емиграција од Македонија во Белгија во изминативе неколку месеци откако се случи визната либерализација. Тоа е пораката што на осми март лично премиер на Белгија, Ив Летерм, заедно со министерот за имиграција, ќе им ја донесе на македонските власти. Според статистиките од Белгија, само во февруари 380 етнички Албанци од Македонија побарале азил во таа земја и тоа врз основа на етничка дискриминација и лоша социоекономска ситуација во матичната држава. Белгиските власти го истражуваат случајот и се уверени дека станува збор за организирана мрежа на сомнителни туристички агенции од Македонија кои на своите клиенти им ветуваат подобар живот. Ваквиот бран е без преседан за оваа мала либерална држава, а властите овој феномен директно го поврзуваат со укинувањето на визниот режим. Од Бирото за бегалци во Брисел порачаа дека сите барања за азил на граѓаните од Македонија ќе бидат отфрлени. „Овие луѓе не можат да добијат статус на азиланти бидејќи тој се добива само врз основа на политички или на етнички прогон, како што предвидува Женевската конвенција“, соопштија белгиските власти. Премиерот Летерм првото предупредување ќе и го пренесе на македонската влада, а најавено е и дека, штом ќе почне белгиското претседателство со Европската унија на први јули, прашањето ќе се најде меѓу приоритетните точки на дневниот ред на Унијата.

Т.М.