Велешанки повеќе сакаат соло

Бројката на разводи во Велес годинава не ветува многу. Ако се земе предвид дека во јануари има најмногу неработни денови излегува дека документи за развод се поднесуваа секој работен ден.

Состојбата со разведените бракови во Велес во последниве неколку години станува алармантна. Претседателот на Основниот суд Јордан Лазаров вели дека од година во година бројот на разведените бракови во Велес постојано е во пораст. Ако пред десетина години бројот на разводите се броел на прсти во 2010 заедничкиот живот го прекинале 134 брачни парови, во 2011-та 136 пара, а само во последниве два месеци во Основниот суд тужби за развод поднеле 26 брачни пара.

Според социјалните работници најчести причини за развод се веќе традиционалните: сиромаштијата, насилството, прељубата, а во последно време и социјалните мрежи. Со транзицијата Велес беше еден од најпогодените градови во Македонија. Со затворањето на Порцеланка, Свилара, Лозар, Топилница и уште дваесетина помали фирми бројката од 2.500 наеднаш порасна на 16.000 невработени. Од индустриски Велес стана град на стечајци и невработени. Беспарицата тропна на скоро секоја врата. Сиромаштијата доведе до насилства, употреба на алкохол, прељуба. Во ваква состојба многу бракови се разнишаа, а некои и побараа засекогаш да се разведат, велат социолозите. Секако, велат тие, а доказ се и судските пресуди, големо влијание за се поголемиот број разводи во Велес имаат и социјалните мрежи. Бројката на разводи годинава не ветува многу. Ако се земе предвид дека во јануари има најмногу неработни денови излегува дека документи за развод се поднесуваа секој работен ден. Овој тренд не важи само за Велес. Статистиката покажува дека секој петти брак во Македонија завршува со развод.