Тестирања на крајот на учебната година

Екстерното препуштено на Државниот испитен центар?

Државен испитен центар да се грижи за реализирање на екстерното оценување во училиштата, е размислувањето во Министерството за образование и наука откако Уставен суд го укина екстерното тестирање. Неофицијално дознаваме дека во Министерството чекаат на заживување на Законот за ДИЦ, а наводно во подготовка се и измени на овој закон, со кој на Центарот ќе му се даде законска можност целосно да раководи со тестирањето. Но, прашање е колку ваквото решение на Министерството се коси со законите и Уставот, бидејќи претходно Уставниот суд го укина екстерното токму поради тоа што државни органи го подготвуваа.

Судот ги прогласи за неуставни одредбите во законите за основно и за средно образование донесени во 2008 година, според кои Министерството за образование и Државниот просветен инспекторат се задолжени за организирање и спроведување на екстерното тестирање на учениците. Министерството експресно реагираше дека нема да се откаже од екстерното оценување и дека ќе најдат форми како да се врати тоа.„Државниот испитен центар со новиот закон ќе стане посебен орган. Тој раководи со државната матура, а сега со измените се планира во негова надлежност да бидат и екстерните тестови“, коментираат од ресорното министерство.

Доколку се исполни оваа идеја, тоа ќе значи дека повторно државни органи ќе се грижат за спроведувањето на екстерните тестови, што беше и главна причина за одлуката на Уставниот суд. Судот со одлуката не го поништи целосно екстерното тестирање, но забрани него да го спроведуваат и организираат државни органи како што е Министерството. (Ж.Х.З.)