Владата ќе носи навивачи во Шведска

 Новите дресови на нашите ракометари

Неверојатна мобилизација се случува деновиве кај македонските иселеници во Гетеборг, на само две недели пред почетокот на ракометниот квалификациски турнир во ракомет за пласман на ЛОИ во Лондон, каде што Македонија се бори за едно од првите две места во групата во која се и Шведска, Унгарија и Бразил.

Каде и да одат, македонските навивачи прават фантастична атмосфера

Ѓорѓи Трпинов, еден од главните организатори на мобилизацијата кај нашинците во Гетеборг, ни ја пренесува атмосферата од шведскиот град, каде што има неколку македонски друштва на иселеници.

„Максимално сме ангажирани. Владее тотална еуфорија, се купуваат билети, им се делат организирано на членовите на друштвата. Досега само ние тука имаме купено 5.000 влезници за натпреварите на Македонија, поддршката што ракометарите ќе ја имаат во Скандинавиум ќе биде невидена. Народски кажано, на секој агол, на секоја улица има нашинец што е задолжен да го рекламира настанот. Не верувам дека има Македонец во Шведска што не знае што се подготвува за периодот 6-9 април“, вели Трпинов.

Тој се надева дека уште повеќе Македонци ќе има во арената во Гетеборг (капацитетот на салата е 12 илјади), зашто во бројката не се сметани навивачите што со чартер-летови и со автобуси ќе допатуваат од Македонија, но и од другите европски земји. Трпинов исто така нè информираше и за љубомората кај Швеѓаните од невидената мобилизација на Македонците за овој настан.

Швеѓаните со право ни љубоморат

„Викендов играше нивниот претставник во Лигата на шампионите (Савехоф н.з.) и во салата имаше едвај 4.000 навивачи. Тие се добро информирани каква еуфорија кај нас владее за ракометот, знаат и како се навива на дуелите на Металург. Се чувствува дека се љубоморни, не гледаат нас, како се подготвуваме, како едвај го чекаме моментот да дојдат нашите момци. Згора на тоа, ги боли што тие како домаќини може да останат со најмалку навивачи во арената Скандинавиум, зашто информациите што ги имам јас се дека и од Унгарија ќе дојдат многу навивачи на нивната репрезентација“, објаснува Трпинов.

Освен големата поддршка што Кирил Лазаров и неговите колеги од репрезентацијата ќе ја имаат во салата, се очекува вистинско лудило и на улиците во градот, кој се очекува да биде празен поради прославувањето на католичкиот Велигден. Во време кога масовно Швеѓаните ќе заминат надвор од градот, Гетеборг ќе биде обоен во црвено-жолто. Затоа, Трпинов најавува дека се очекува организирање на огромна фан-зона и тоа на стадионот каде што настапува фудбалскиот клуб Вардар од Гетеборг, екипа која ја имаат формирано нашите иселеници во далечната 1972 година.

„Очекуваме таму да биде главното дружење на сите навивачи пред и по натпреварите, ќе има храна, сокови, пиво… Местото не е многу далеку од салата, има околу 4 километри, но со јавен превоз се патува кратко. Фан зоната би требало да работи нонстоп, таму ќе биде центарот на сите случувања, секако и нашите ракометари би сакале да дојдат таму и да се дружат со нас“, вели Трпинов.

Македонија во Гетеборг ќе се чувствува како домаќин, поддршката ќе биде исто толку голема како што беше во јануари на ЕП во Србија, кога завршивме на петтото место. Сите предуслови за радост се исполнети, останува уште ракометарите да ги повторат игрите од Ниш и Белград и потоа на ред за окупација да дојде и Лондон…