МУЗИЧКИ ВЕСТИ

Одложен е настапот на познатиот музичар Рамбо Амадеус вечерва во Скопје, поради сообраќајна несреќа на еден од членовите на неговиот бенд.

Во несреќата бил повреден Владимир Чукиќ, басистот на РАСМЦ (Рамбо Амадеус светски мега цар), поради што брендот соопшти дека е приморан да го одложи концертот во Скопје за десетина дена.

Басистот Чукиќ е полесно повреден со скршеници на левата рака. Рамбо Амадеус и неговиот бенд РАСМЦ требаше да настапат на концертот што по повод годишнината од ослободувањето на Скопје ќе се одржи вечерва во Младинскиот културен центар.

Организаторите соопштија дека, и покрај одложувањето на настапот на РАСМЦ, вечерашниот концерт насловен „Ослободи се Скопје“ ќе се одржи. Меѓу десетината групи кои ќе настапат е познатиот српски рок бенд „Обојени програм“.

Гудачкиот квартет: Јане Бакевски, Фросина Богдановска, Александар Стојчевски и Александар Котевски имаат за цел да ја дополнат празнината во камерниот живот во нашата земја, но и со своето музицирање да освојуваат музички простори надвор од нашите граници.

Со концертот на гудачкиот квартет Еквилибриум, вечерва (20 ч.) ќе биде промовирана новата концертна сала "Империјал", лоцирана во Македонската опера и балет. Покрај гудачката четворка од Еквилибриум: Јане Бакевски (прва виолина), Фросина Богдановска (втора виолина), Александар Стојчевски (виола) и Александар Котевски (виолончело), чест да музицира на концертот ќе има и гостинката Марија Ѓошевска на пијано. На концерната програма ќе се свират дела од Роберт Шуман и Дмитриј Шостакович.

Името Еквилибриум всушност означува рамнотежа, баланс, хармонија, па во тие рамки се движат и настојувањата на квартетот за истражување во просторот на совршеноста на музиката, на хармонијата и звуците на новото време. Нивната интерпретација произлегува од потребата да се обратат кон публиката, со една мисла и една порака во што всушност се состои и совршеноста на музиката. Тоа се силно мотивирани современи музичари, кои со досегашното темелно, сериозно и посветено образование се здобија со големо музичко знаење, сигурност во себе и во уметничката интерпретација... Со постоењето на овој гудачки квартет се надополнува празнината во камерниот живот во Република Македонија, бидејќи имаат за цел да донесат еден нов звук на музичката сцена во Македонија и странство, а интенцијата е Еквилибриум да прерасне во еден од водечките квартети, не само во македонски рамки. За таа цел овие музичари со посветеност работат на повеќе проекти во Македонија и странство, планирани за следната година.

Гостинот Марија Ѓошевска има зад себе солидно концертно искуство (ревијални настапи, во земјата и странство), како и учество на повеќе натпревари, на кои има постигнато врвни резултати. По завршувањето во класата на проф. Снежана Анастасова Чадиковска и магистратурата кај проф. Борис Романов со голем успех настапува како солист придружувана од Македонската филхармонија, Дубровничкиот симфониски оркестар, Камерниот оркестар на Музичката младина и фестивалскиот оркестар на Охридско лето.