Шах торта

Состојки

• прв пандишпан ( темно тесто )
• 3 јајца
• 60 грама шеќер
• 40 грама мелени бадеми
• 40 грама темна чоколада за готвење
• 30 грама брашно
• втор пандишпан
• 60 грама шеќер + 3 јајца
• 40 грама мелени лешници
• 40 грама темно чоколадо за готвење
• 30 грама брашно
• трет пандишпан ( жолто тесто )
• 6 јајца
• 180 грама шеќер
• 1 лимон ( рендана кора и сокот од лимонот )
• 120 грама брашно
• крем
• 4 жолчки
• 4 лажици млеко
• 140 грама шеќер
• 1 ванила
• 120 грама растопена чоколада за готвење
• 180 грама маргарин
• втор фил
• 350 мл слатка павлака и 7 лажици шеќер
• за декорација
• 5 -6 мали правоаголни чоколади ( или чоколадни коцки, како сакате)
• 100 грама бело чоколадо за готвење
• 100 грама темно чоколадо за готвење

Подготовка

За мојот стоти рецепт се одлучив да ја направам оваа шах торта.
Рецептот ми е од еден многу стар готвач, одамна сакам да ја направам и еве денес и дојде редот.

Во оригиналниот рецепт за оваа торта ви се потребни 2 пандишпани, еден темен и еден жолт. Се прават правоаголни кори, се делат на два дела, потоа на жолтата кора се премачкува од кремот и се редат коцки, една темна една жолта и да се добие поле на шах. Потоа се става темната кора и се почнува со спротивната боја од претходната кора, значи темна коцка и така наизменично да се добие пак шаховско поле. Тортата ја филувате со крем и ја декорирате.
Но, јас ја правев на поинаков начин, односно со кружни пандишпани, а овде начинот на редење малку се разликува од претходниот ќе ви презентирам понатаму.
Ако ја правите на мој начин можете кај темната кора да ја дуплирате дозата и така наместо да правите посебни пандишпани можете да го пресечете хоризонтално на средина како што се сече жолтиот. Јас правев три бидејки во едниот има лешници во другиот бадеми.

Бадемите и лешниците ги мелеме во посебни садчиња. Чоколадото го растопуваме. Од белките правиме добро изматен снег од белки.

За темното тесто ги матиме жолчките со шеќерот, убаво да се згусти смесата. Го додаваме растопеното чоколадо, бадемите и промешуваме. Го додаваме и брашното, промешуваме малку со миксерот и го додаваме снегот од белките и добро мешаме да се изедначи смесата.

Рерната ја загреваме на околу 180 - 200 степени. На плекчето ставаме малку зејтин, размачкуваме насекаде и ставаме исечена хартија за печење. Ја истураме смесата и печеме околу десетина минути или зависно од јачината на рерната. Повремено проверуваме со чепкалка да не се лепи од тестото.

Жолтиот пандишпан го правиме на следниот начин.
Од белките правиме снег. Жолчките добро ги матиме со шеќерот, го додаваме исцедениот сок од лимонот, ренданата кора и брашното. Го додаваме снегот од белки промешуваме и печеме. Кога се испечени сите пандишпани ги сечеме хоризонтално. Јас печев во плекче број 28. Поделете ги пандишпаните на пет дела (обрачи со чинија, потоа со помала, пак помала или некоја тацна така да обрачите бидат со иста ширина како што се гледа на дополнителните слики)
Последното ќе ви остане мало кругче.

За подготовка на кремот ставете во подлабок сад да зоврие вода.
Во друг сад ставете ги жолчките. шеќерот, млекото и ванилата. Ставете го садот над тенџерето и со рачна мешалка со постојано мешање бркајте додека да се згусти кремот. Потоа додајте го растопениот маргарин кој претходно добро ќе го изматите. Се заедно промешајте убаво да се изедначи кремот. Во мојот случај тортата ја филував со кремот и со слатка павлака.
Павлаката ја мешаме со шеќерот убаво да се згусти. Ако сакате може и само со крем фил само дуплирајте ја дозата.

Го земаме најголемиот обрач од темното тесто и го ставаме на површината на која ќе ја филуваме тортата. Земаме од филот и ставаме странично внатре околу обрачот. Го додаваме помалиот обрач од жолтото тесто, го филуваме и го ставаме помалиот обрач од темното тесто. Така правиме до последното делче од пандишпанот. Нежно со рацете притискаме насекаде да биде рамна површината на тортата и ја филуваме со кремот.

Наредниот спрат на тортата го започнуваме со најголемиот обрач од жолтото тесто и како на првата кора редиме наизменично, една па друга боја. Така ја повторуваме постапката до крајот на редењето на сите обрачи. На крајот тортата ја филуваме со кремот или павлаката во мојов случај.
Чоколатцата исечете ги на квадратчиња и декорирајте ја тортата по ваша желба.

Оваа торта многу е декоративна, а секако и вкусна, затоа ви ја препорачувам да ја пробате. За декорацијата не мора строго да се придржувате до количината на состојките, можете да филувате и со рендано чоколадо како шаховско поле. Ви посакувам убаво да се засладите.

Дополнителни фотографии

Празнични колачи за 2014г

Состојки

• 4 жолчки
• 1 цело јајце
• 2 чаши од јогурт мед
• 1 чаша од јогурт масло
• 1 чаша од јогурт шеќер
• 1/2 чаша од јогурт млеко
• 1 полна лажица сода бикарбона
• 2 лажици ванила
• 2 лажици цимет
• 1кг брашно
• Бела глазура-ројал ајсинг
• 1 белка од јајце
• 250гр шеќер во прав
• сок од 1 лимон

Подготовка

Секоја година ги правиме со мојата Еми овие колачиња. Тие се вистинско уживање за правење и релаксирање. Но најпрво да се пушти фантазијата и да се почне со работа.

Од сите состојки се замесува глатко тесто и се остава да се одмори 20мин. Потоа се сучи кора и со калапите од делимано се прават различни форми. Бидејки и беше желба на Еми да направиме слатка кука, така и направивме и тоа е нејзино ремек дело. Колачите се печат на 180С -15мин. Кога ќе се испечат се оставаат во плехот да се малку оладат и на допир мора да бидат меки.

Глазура
Белката се мати на средна брзина со миксер и постепено се додава шеќерот во прав. Треба да се добие густа смеса и постепено се додава малку лимонов сок(1лажица) Да не биде многу ретка смесата. Се става во кеса се засечува на врвот и се украсуваат колачињата.
Ако сакате може да се стават и прехрамбени бои и смесата за украс да биде во различни бои.
Срекни празници!

Дополнителни фотографии

Божиќни колачиња

Состојки

• 500 гр. брашно
• 200 гр. шеќер
• 250 гр. маргарин
• 2 јајца
• 1 прашок за пециво
• 1 рендана кора од лимон или портокал

Подготовка

1. Најпрво се ставаат маргаринот (претходно оставен на собна температура) шеќерот и ренданата кора. Се меша убаво со раце.
2. Потоа се додаваат јајцата и пак се меша.
3. На крајот малку по малку се додава брашното во кое го ставаме пецивото и ја месиме смесата додека не се соедини убаво.
4. Готовото тесто го ставаме да отстои во фрижидер околу 3-4 часа.

Кога тестото е готово се развлекува кора и со калапчиња се прават форми по ваш избор.

Јас половина од колачињата ги украсив со растопено чоколадо, а другата половина со гласа која ја направив со шеќер во прав, малку топла вода и сок од лимон.Во оваа смеса се додаваат прехрамбени бои и се украсуваат колачињата.

Многу се лесни за правење и многу вкусни. Можат да се направат за било која пригода и во различни форми.

Шарени божиќни ѕвезди

Состојки

• 250гр. брашно
• на врв на нож прашок за печиво
• 100гр. шеќер
• 1 пакетче ванилин шеќер
• на врв на нож мелен цимет
• на врв на нож мелено каранфилче
• на врв на нож мелен кардамом
• на врв на нож мелен анис
• 1 јајце
• 125гр. путер омекнат
• Глазура
• 100гр. чоколадо за готвење
• 1 лажиче зејтин
• шарени шеќерни перли

Подготовка

Сите состојки за тестото заедно со зачините ставете ги во еден длабок сад и изматете ги со миксер со спиралните маталки. На крај измесете ја смесата со раце за да добиете мазно тесто.
Работната површина набрашнете ја и развлечете тенка кора од тестото. Со модлици во две различни големини вадете ѕвезди (ист број од двете форми). Ставајте ги во плех на хартија за печење и печете ги 8-10 минути на 180° во претходно загреана рерна. Откако ќе се испечат оставете ги убаво да се оладат.
За тоа време подгответе ја глазурата. Чоколадото искршете го на коцки, па заедно со зејтинот ставете го на пареа да се стопи.
Големите ѕвезди премачкајте ги со глазурата и одозгора ставете ги малите ѕвезди така да се гледаат аглите од големите ѕвезди кои ќе ги наросите со шеќерните шарени перли.
Оставете ги да се стегне чоколадната глазура па потоа послужете.
Затворени убаво во кутија можат да траат 3-4 недели.

Дополнителни фотографии

Ова слатко - солено чоколадно задоволство вообичаено го купуваме од продавница. Но, сега може и сами да го подготвите дома. Вкусот е речиси идентичен како и оригиналното чоколадо.

Потребни состојки:

• 1 маргарин + 80 гр за глазурата
• 300 гр шеќер
• 100 гр чоколадо + 100 гр за глазурата
• 3 јајца
• 300 гр бисквити
• 300 гр кикирики
• 2-3 капки масло
  
  

Фил:

Во поголема чинија искршете  300 гр бисквити и додајте 300 гр мелени кикирики. Кикириките пред  да ги сомелете пропржете ги во тепсија додека не добијат малку заруменета боја.

Стопете го маргаринот, 300 гр шеќер, 100 гр чоколадо и додајте ги 3-те јајца. Сето тоа варете го и полека мешајте додека не добиете хомогена смеса и нормална густина.

Двете смеси соединете ги во една чинија и сипете ја измешаната смеса рамномерно во подмачкана тепсија.

Глазура:

Во едно подлабоко тенџере стопете 80 гр маргарин додека не зоврие. Кога ќе зоврие тргнете го од оган и додајте 100 гр искршена чоколада и 2-3 капки масло. Мешајте додека чоколадото не се стопи.

Прелијте ја глазурата врз претходно ставената смеса во тепсија.

Оставете го колачот да се излади и зацврсти на собна температура, а потоа пресечете го на правоаголни коцки.

Суфле тортата е идеален начин да уживате во вкусот на темната, ако сте зависник од овој сладок порок.

Затоа што за подготовка на оваа торта се потребни само 30 минути, е еднa од најлесните и најсочни чоколадни задоволства.

Потребно ви е:

• 300g чоколада за готвење
• 50g какао
• 10 јајца
• 300g шеќер
• Лажичка цимет
• 1 ванилин шеќер
• 500g путер
• Шеќер во прав или чоколадна глазура (за фил)
• Слатка павлака или сладолед за декорација
• Јагоди и малини како додаток
  
  

Подготовка:

На пареа, на тивок оган растопете го путерот, чоколадото и циметот.

Во посебен сад одвојте ги жолчките и белките. Од белките направете цврст крем, а жолчките изматете ги со шеќерот за да добиете жолт крем.

Оладеното чоколадо истурете го во смесата со жолчки, а потоа постепено додавајте ја пената од белки.

Добиената смеса истурете ја во калап за печење, премачкан со путер и печете на 175 степени половина час.

Откако тортата ќе се олади посипете ја со топено чоколадо, шеќер во прав или цимет. Декорирајте со неколку малини и јагоди, сладолед или шлаг пена.

Ако сакате да бидете креативни, додадете ликер или рум по желба.

Нема некој што не се заљубил во вкусот на бајадерите. Верувале или не, домашно подготвените бајадери се исто толку добри.

Доколку имате желба да подготвите вкусен десерт, во прилог се инструкциите:

Што ви е потребно?

Состојки за внатрешната смеса

• 500 гр шеќер
• 500 гр мелени бисквити
• 200 гр мелени ореви
• 300 гр путер
• 170 мл млеко
• 100 гр црно чоколадо
• 100 гр бело чоколадо

Состојки за глазурата:

• 100 гр црно чоколадо
• 2 мали лажички маргарин
• 1 лажица масло

Како се подготвува:

Млекото, шеќерот и путерот се ставаат во тенџере на оган за да зовријат. Штом почне смесата да врие, садот се тргнува на страна.
Во врелата течност се додаваат бисквитите и оревите и добро се мешаат сите заедно.
Смесата се дели на 2 дела.

Во едниот се додава белото стопено чоколадо, а во другиот црното чоколадо.

Земете плех и прво истурете ја црната смеса со дебелина од прилика 1цм, а потоа ставете ја и белата смеса.

Оставете на кратко да отстојат во фрижидер. Во меѓувреме, подгответе ја глазурата – маргаринот, темното чоколадо и маслото се топат на пареа додека да добијат течна форма.

Прелијте го колачот со глазурата и оставете ги да се изладат заедно.

Сечете на парченца по желба!

Уживајте во омилениот десерт!