Сексот со модерните луѓе ги уби неандерталците

Неандерталците биле жртви на љубовта или барем на размножувањето со припадниците на друг вид, односно со модерниот човек, покажа последната студија.

Обидувајќи се што подобро да се привикнат на климатските промени, неандерталците се пареле со „нашиот вид“ одгледувајќи мешовит вид на луѓе, се наведува во студијата.

После генерации генетско мешање, неандерталскиот геном се стопил со геномот на хомо сапиенсите, кои биле побројни, и едноставно исчезнал.

- Ако се зголеми подвижноста на групата на кои живееле, се зголемува и протокот на гени меѓу двете популации, додека едната популација во целосно не исчезне, вели еден од авторите на студијата С. Мајкл Бартон, археолог на одделот за човекова еволуција и социјални промени на универзитетот во Аризона.

Според некои теории Неандерталците исчезнале пред околу 30.000 години бидејќи видот не бил способен толку добро да се прилагоди на ладењето на планетата како што можел Хомо сапиенсот. Бартон пак смета дека неандерталците исто реагирале на доаѓањето на Леденото доба, како и модерните луѓе.

- Како што се зголемувал студот, така дотогашните живеалишта почнувале да нудат се помала разноликост, па неандерталците, исто како и модерните луѓе, се фокусирале на стратегијата за преживување која уште е застапена на високите географски ширини, тврди Бартон.

Според Бартон, неандерталците направиле база и праќале избрани припадници по собирање намирници и потребни средства за живот.

- Луѓето се селеле подалеку и така се изложувале на контакт со други пооддалечени групи, што станало вообичаено во Евроазија, особено кога Земјата се заладувала, вели Бартон.

Честите контакти довеле до парење бидејќи и двете групи луѓе делеле исти ресурси.

- Можеби се случило и нешто друго, но во науката секогаш се бара наједноставното објаснување. Оваа теорија не вклучува масивни миграции или инвазии, туку тоа што луѓето вообичаено го прават, смета Бартон.

За да се процени влијанието на претпоставеното парење меѓу видовите, тимот на Бартон спровел ново истражување, базирано врз компјутерски модел кој опфаќа 1.500 неандерталски генерации.

Резултатите од истражувањето се поклопуваат со новата идеја за неандерталската „генетска преплавеност“ од модерниот човек.

Иако ова не е најсреќното решение на теоријата за изумирањето на неандерталците, сепак овој начин на изумирање е добро познат мешу растителните и животинските видови и се нарекува „изумирање поради хибридизација“.