БИЗНИС ВЕСТИ, НОВОСТИ, ИНФОРМАЦИИ...

ВЛАДАТА ЌЕ ГО РЕГУЛИРА ОТКУПОТ НА ЖОЛТОТО ЗЛАТО

За кило увезена, три килограми откупена пченица

Според министерот за земјоделство, Љупчо Димовски, државата го условува увозот на пченицата за пазарот на Македонија по количина на откупена пченица произведена во земјава во однос 1 спрема 3

Во пресрет на стартот на жетвата на пченицата, Владата донесе мерки со кои ќе го регулира откупот. Според министерот за земјоделство, Љупчо Димовски, државата го условува увозот на пченицата за пазарот на Македонија по количина на откупена пченица произведена во земјава во однос 1 спрема 3.
-Значи за три килограми откупена пченица секој лиценциран увозник ќе треба да добие согласност за увоз на еден килограм пченица. Сето тоа ќе биде координирано помеѓу Царинската управа и Државниот инспекторат за земјоделство којшто ќе врши евиденција на откупената пченица - вели министерот Димовски.

Втората мерка е околу дефинирање на количината на пченица за потребите на стоковите резерви. Според Димовски, државата ќе откупува пченица од домашните производители по 9 денари за килограм.
-Во овие услови ова е навистина солидна и повеќе од коректна цена. Можеби оваа цена нема да ги покрие сите трошоци на производителите, но мислам дека ќе биде прифатена од земјоделците со оглед на висината на субвенцијата којашто ја добиваат по хектар - вели Димовски.

Третата мерка се однесува на задолженијата што им ги дава Владата на надлежните институции, конкретно се мисли на Државниот инспекторат за земјоделство, Бирото за метрологија, пазарниот инспекторат и Дирекцијата за контрола на храна. Димовски вели дека е многу битно што имаме негативен тренд во увозот на брашно на домашниот пазар.
-Дирекцијата во изминатиот период има извршено околу 900 анализи на брашно коешто влегува во Македонија и со жалење можам да кажам дека тоа не одговара на квалитетот. Со оглед на неговата ниска цена од 12 денари за килограм брашно, тоа е навистина потценувачки ниска цена за вредноста на нашата пченица и на брашното. Оттука не треба да не зачудува зошто од одредени пекарници јадеме неквалитетен леб. Поради тоа, ќе бидат зајакнати контролите - вели Димовски.

Исто така ќе се води и внатрешна контрола на прометот со пченица и со брашно од страна на Државниот инспекторат за земјоделство.
-На тој начин не сакаме да го покриеме прометот со пченица, туку да ги заштитиме земјоделците од евентуално див или нелегален влез на пченица и на брашно, бидејќи се констатирани и такви случаи - потенцира министерот Димовски.
Мерките на Владата ќе стапат на сила по нивното објавување во "Службен весник".



Светлана БЛАЖЕВСКА