Македонци кои никогаш нема да се заборават

Тетово, 28 април (МИА) - Во црквата „Свети Кирил и Методиј“ во Тетово денеска се одржа помен парастос во чест на осумте трагично загинати бранители кои беа убиени на денешен ден во 2001 година во близина на тетовското село Вејце.

На панихидата покрај членовите на семејствата на загинатите присуствуваа и премиерот Никола Груевски, министерката за внатрешни работи, Гордана Јанкуловска и министерот за транспорт и врски Миле Јанакиевски, а ја отслужија свештенослужители од тетовското архиерејско намесништво.

- Владата на Македонија во континуитет настојува да им изрази поддршка на семејствата на загинатите бранители. Токму во текот на вчерашниот ден лично премиерот Груевски им ги врачи клучевите од становите кои со решение им беа доделени уште во 2002 година. Поддршката која ја даваме на оваа категорија граѓани ќе продолжи, оти тие направија многу за Македонија, изјави по завршувањето на помен парастосот министерката Јанкуловска.

Во 2001 година кај Вејце загинаа вкупно осум припадници на безбедносните сили, а шест беа повредени.

Кај Вејце загинаа Роберт Петкоски од селото Бунарџик, Скопје, Бобан Трајкоски од Куманово, Игор Костески од Скопје и Миле Јаневски од Македонска Каменица сите припадници на единицата Волци при АРМ и нивните колеги од единицата на МВР „Тигри“, Марјан Божиноски од Битола, Илче Стојаноски од село Породин, Кире Костадиноски од Горно Оризари и Бошко Најдоски од Долно Оризари и двајцата од Битола.