Сочни и меки: Зебра палачинки

Веројатно досега сте слушнале за зебра колачот и зебра тортата, па тогаш зошто не би постоеле и зебра палачинки?

Тестото е речиси идентично како за обичните, со тоа што треба да ја погодите шарата.

Потребни состојки:

• 500ml млеко
• 2 јајца
• Малку сол
• 1 лажица растопен маргарин
• 1 dl минерална вода
• Брашно по потреба додека тестото не стане кремасто и густо
• 1 лажица какао (оди во ¼ од тестото)
• 1 пумпа или кеса за правење шара

Подготовка:

Измешајте ја смесата за тестото, брашното додавајте го додека не биде кремасто и средно густо. Веројатно добро знаете, сте ги правеле 1000 пати.

Од смесата одвојте ¼ во помал сад и додајте го какаото. Измешајте додека не добиете кафеаво тесто.

Ставете ги различните теста во две кеси или пумпи за правење шари.

На загреана и намачкана тава со масло правете кругови наизменично од белото, па кафеавто тесто.

Испечете и филувајте по желба.

За да не валкате садови: Палачинки во шише

Наместо да валкате садови или чинии со цел да ја направите смесата за палачинки, сега ви е доволно да пронајдете само едно празно шише...

Отсега правењето на палачинки ќе ви стане лесно како песна. 

За подготовка на тестото потребно ви е:

• 2 јајца
• 10 полни супени лажици брашно
• 3 супени лажици шеќер
• ½ кафена лажичка сол
• 3 супени лажички масло
• 600ml млеко
• Газирана вода

Начин на подготовка:

Во празно шише ставете инка и додајте го брашното, шеќерот и солта. Потоа додајте ги јајцата, маслото, млекото и 3 чаши газирана вода. Прво одат сувите состојки, а потоа течните.

Затворете го шишето и добро протресете ја смесата за да се изедначи. Ако темелно го протресете шишето, нема да останат грутки.

Потоа земете тавче, стајте малку масло и истурајте од смесата од шишето во тавчето и печете ги палачинките.

Не морате целото тесто одеднаш да го потрошите. Оставете го шишето со смесата во ладилникот и подгответе свежи палачинки и утре. 

Француски, австриски или американски палачинки?

Француските палачинки познати како „crepes“ се тенки палачинки полнети со разновидни  вкусови. Тие не се само благи, можат да бидат и солени, полнети со павлака, месо, зеленчук, јајца па дури и риба. Палачинките веќе не се само за појадок, тие се совршен избор за секое јадење во денот.

Австриските палачинки – „Kaiserschmarrn“ можеби Ви се познати. Смесата според која се подготвуваат е малку погуста и крајниот резултат не е класична палачинка. Тестото за палачинките се дели на делови за време на печењето и се додаваат различни состојки како малини, лешници или суво грозје. Ако не се снаоѓате во превртувањето на палачинките, со австриски палачинки не можете да погрешите .

Американските палачинки се подебели и помали од француските, па затоа се полесни за правење. За разлика од Французите кои ги полнат палачинките па потоа ги замотуваат или ги превиткуваат, Американците едноставно ставаат благи сирупи, различни видови на овошја, дури и слатка павлака врз палачинките и тие се спремни за јадење.

Рецепт за домашни Орео палачинки

Дечињата ќе ги обожаваат, а и вашите пријатели ќе се израдуваат ако ги послужите после кафето.

Во никој случај нема да го згрешите вкусот, затоа што е лесен за подготовка, дури и ако сте почетници во кујната.

Состојки за 4 порции:

• 500ml млеко
• 8 јајца
• 125g несолен путер
• 2 лажички екстракт од ванила
• 700g брашно
• 1 прашок за печиво
• 125g шеќер
• 150g Орео колачиња

За фил:

Можете да комбинирате матен путер со кокосово брашно или крем по желба.

Подготовка:

Растопете го путерот, па додајте го млекото со јајцата и екстрактот од ванила.

Во посебен сад измешајте ги брашното, прашокот за печење и шеќерот. Постепено додавајте ги во млекото со јајца и путер и постојано мешајте.

По 5 минути мешање додадете ги ситно искршените или измелените Орео колачиња.

Загрејте малку масло на тавче, ставете од тестото и испечете округли, малку подебели палачинки.

Доволни се 3 минути печење од секоја страна за палачинките да бидат готови.

Врз секоја палачинка ставете фил по желба, украсете со кокос, чоколадо, шлаг или уште искршени Орео кекси.

Уживајте!

Пробајте: Меки палачинки со пиво

Ова е малку поинаков рецепт и начин да подготвите тесто за меки палачинки кои ќе ги паметите уште долго.

За подготовка на тестото ви се потребни само 4 состојки и 10 минути.

• 200g брашно
• 400ml пиво
• 1 лажица мед
• 3 јајца

1. Изматете ги јајцата и додајте го пивото. Добро измешајте.

2. Додајте го медот, па потоа брашното. Мешајте додека не исчезнат грутките.

3. Пржете на жешко масло. Послужете ги солени или благи, по ваш избор.