Кој е Груевски?

Жална Македонија – каде мора да го молите премиерот за лек за рак на кожа

Откако беше потпишан Договорот од Пржино, премиерот Никола Груевски, започна интензивно да шета низ Македонија и да остварува средби со граѓани кои му ги кажуваа своите проблеми, па тој ги решаваше, давајќи им наредби на градоначалници, министри, директори… директно доколку беа во негова близина, или по телефон пред камери.

Како што многумина коментираа, со ова само се покажува дека системот не функционира, доколку мора и за најситните работи да го најдете премиерот на државата и нему да му се пожалите, па да чекате да се смилува и да ви ги реши проблемите.

Сепак, денешниот случај предизвика најостри реакции на социјалните мрежи.

Се работи за Марјан Велјаноски од Охрид кој има меланом, односно рак на кожата, и како што извести Телма пред пет дена, може успешно да се лекува со „Вемуруфаниб“ таблети, со кои шансите за продолжување на животот се до 70%. Нив ги нема на позитивна листа, а неделна доза чини 125.000 денари. Благодарение на хумани охриѓани Марјан успева да собере околу 30.000 евра и да започне со лекување, но кога му завршиле парите престанал да се лекува.

За помош се обратил до министерството и Фондот за здравство од каде бил информиран дека лекот не може да му биде обезбеден.

„Во врска со барањето на осигуреното лице М.В.  станува збор за набавка на лек кој не е на Позитивната листа на лекови. Би сакал да информираме дека Фондот нема, согласно членот 9-а од Законот за здравствено осигурување, начин и методологија за утврдување и донесување на Листата на лекови кои паѓаат на товар на Фондот. Позитивната Листа на лекови кои паѓаат на товар на Фондот ја утврдуваат 14 стручни комисии формирани од Владата на РМ, а на предлог на Министерството за здравство, согласно меѓународната АТЦ класификација на лекови.“ – реагираше Фондот за здравство.

И тука доаѓаме до денешниот ден…

Груевски беше во посета на Охрид, и охридскиот регион, па во Лескоец, Велјановски успеа да се сретне со него и да му ја каже својата мака и практично да го моли за лекот.

< width="500" height="281" ="https://www.youtube.com//7LoEt5MB_zw?feature=o" border="0" allowfullscreen="">

Ниту 14 комисии, ниту стручни методологии, како што претходно одговорија од Фондот за здравство… одлуката ја носи премиерот на лице место… во пресрет на изборите и неговата неизвесна политичка судбина, а истата може да се користи како реклама за неговата доблест и широчина на телевизиите под контрола на власта.

Се поставува прашањето, дали може да се смета за нормална државата каде болните треба да го најдат премиерот и лично него да го молат за да им се обезбеди лек за да може да преживеат?! Колку процентни поени на рејтинг листите вреди човечкиот живот?! Што се случува со оние кои имаат проблеми а не можат да го најдат премиерот и лично да му се пожалат?!