Куп на Македонија

   Македонија ЃП - Работнички в недела во финалето на Купот

Двојна круна за Македонија Ѓорче Петров или спас на сезоната за Работнички. Одговорот на оваа дилема ќе го даде в недела финалниот натпревар на македонскиот фудбалски Куп.

На арената „Филип Втори“ за пехарот ќе се судрат новиот првак, кој во црвено-жолто ја обои првенствената сезона која привршува и ланскиот шампион и куп-освојувач, кој со самиот настап во завршницата веќе обезбеди излез на евро-сцената.

„Во моментов ја пишуваме историјата на клубот, поради тоа што веќе ја освоивме шампионската титула. Сега ни се отвора шанса за освојување на купот“, изјави Илчо Ѓорѓиоски, менаџерот на Македонија ЃП.

„Покажавме победнички дух, знаевме што сакаме и како да стигнеме до целта, затоа мислам дека ќе бидеме спремни да одговориме на предизвикот“, додава Ѓорѓиоски.

„Нашите очекувања и желби одат во насока, барем да ја спасиме сезоната. Овие играчи имаат квалитет, можат да ја освојат титулата“, изјави менаџерот на Работнички, Гордан Здравков.

„Се игра еден натпревар во кој ќе победи оној кој најмалку ќе греши, а секако и индивидуалниот труд ќе се цени најмногу“, анализираше Здравков.