Отворено лизгалиште во Струмица!?

Плоштадот во Струмица ќе постане лизгалиште. Од почетокот на декември до почетокот на март, ќе биде поставено отворено монтажно лизгалиште на површина од 600 м. квадратни  чист простор. Свеченото отворање е планирано за ноќта спроти патрониот празник на Струмица, на 10 декември.

Лизгалиштето ќе биде поставено помеѓу Саат кулата и Домот на културата, а ќе почне да се монтира кон крајот на овој месец од страна на австриската фирма “Соклав“. Со него ќе управува Координативното тело при Младинскиот Форум на општина Струмица, а во него ќе работат пред се млади луѓе, членови на Младинскиот Совет, кои ќе имаат обука од страна на претставници на компанијата “Соклав“, за тоа како да внимаваат на безбедноста на граѓаните и на децата.

Објектот ќе биде долг 30, а широк 20 метри. Инвестицијата за изнајмување на лизгалиштето изнесува два милиони денари, буџетски средства кои им се дадени на располагање на Младинскиот Совет, а според договорот со австриската фирма, на располагање ќе бидат 300 пара нови некористени лизгалки, специјални помагала, пингвини, бели мечки и душеци, кои ќе им олеснат на почетниците.

Првото отворено лизгалиште во Струмица ќе работи во текот на денот, но и во вечерните часови до полноќ, а истовремено ќе може да лизгаат максимум 250 луѓе. Неофицијално дознаваме дека цената на билетот ќе изнесува 50 денари за деца и 100 денари за возрасни, за еден час. Собраните средства од продажбата на билетите, Младинскиот Совет ќе ги употребува во други проектни активности.

Лизгалиштето ќе биде опремено според светски стандарди, со машини за острење на лизгалките, машини за одржување и мазнење на мразот, со панели од поцинкуван челик, а ќе биде оградено со алуминиумска ограда.

Извор: strumicanet.com