Акција “ПУЧ“ и бомбите на Заев

Случајот „Пуч“ од обвинителството се сели во судница. Јавното обвинителство поднесе обвинение против лидерот на опозицијата, Зоран Заев за насилство спрема претставници од највисоки државни органи. Заев, поранешниот разузнавач близок до СДСМ Зоран Верушевски, неговата сопруга, вработен во општина Струмица, и вработен во полицијата, се обвинети дека преку употреба на незаконски средства на следење и шпионирање со цел упатување на закани кон високи државни функционери, сакале да извршат политички преврат и да изнудат разни други услуги. Сите обвинети, освен Заев кој се наоѓа на слобода, со одлука на Кривичниот совет при Основниот суд Скопје 1, а по предлог на обвинителството, ќе останат во притвор, каде се веќе неколку месеци. 

Ваквата одлука на обвинителството е пристигната во судот и е предадена на судски совет кој исто така ќе ја разгледува. Обвинетите имаат право на приговор на обвинението, по што доколку тој биде одбиен, ќе биде закажан судски процес. 

Обвинението против првиот човек на СДСМ е поднесено само неколку часа по најавите дека опозицијата на 17 мај ќе одржи протест во главниот град, како и само еден ден пред одржувањето на конгресот на владејачката партија во ВМРО-ДПМНЕ во Куманово. Одлуката беше соопштена завчера во доцните вечерни часови. 

Според обвинението кое Јавното обвинителство за организиран криминал и корупција го достави до Основниот суд Скопје 1, првообвинет е поранешниот разузнавач Зоран Верушевски. Тој ќе одговара за неовластено прислушување и тонско снимање, шпионажа и насилство спрема претставници од највисоки државни органи. Ексразузнавачот во текот на овој месец ќе седне на обвинителна клупа и за вториот судски предмет кој се води за него – за недозволено поседување оружје. 

„Обвинетиот припадник на полицијата, Ѓорѓи Лазаревски е обвинет за неовластено прислушување и тонско снимање и  шпионажа. Сопругата на Верушевски, Соња е обвинета за шпионажа, додека вработениот во општина Струмица - Бранко Палифоров за насилство спрема претставници од највисоки државни органи“, соопшти судот. 

Обвинителниот акт е распределен на совет за оценка. Шестоосомничениот во овој случај, Звонко Костовски, кој е поранешен припадник на УБК, во февруари  се спогоди со обвинителството за казна затвор од три години.

 Обвинението против Заев, Верушевски и уште тројца приведени во случајот „Пуч“ е поднесено само два дена откако обвинителот задолжен за предметот Златко Биковски за „Утрински весник“ изјави дека ќе биде потребно повеќе време за да се донесе одлука за случајот. 

„Течат законските рокови откако адвокатите побараа увид во дел од доказите. Се' додека не изминат предвидените термини, не можам да донесам каква и да е одлука. Согласно со законот, не можам да кажам ништо повеќе за досегашниот тек на постапката, но сметам дека во јавноста не треба да се изнесуваат непроверени информации“, изјави обвинителот Биковски само еден ден пред да биде поднесено обвинението. 

Истрагата беше заокружена откако лидерот на опозицијата даваше пет часа исказ во Судската палата, по што побара обвинителот да ја прекине истрагата за случајот „Пуч“ и да отвори нова истрага за премиерот и за директорот на Управата за безбедност и контраразузнавање, против кои поднесе кривична пријава за злоупотреба. 

Заев неодамна до Обвинителството достави докази, како што тврди, за масовно прислушување, кои содржат повеќе од 100 илјади разговори, над 18 илјади СМС пораки и листа на повеќе од 12 илјади различни телефонски броеви.

Заев го товарат за кривично дело насилство спрема претставници на највисоки државни органи од член 311 и член 19 од кривичниот закон. Минималната затворска казна за тоа дело е 4 години затвор. Но, бидејќи обвинителството ставило квалификација обид – во членот 19 од кривичниот закон стои дека сторителот ќе се казни во границите на зaконски пропишаната казна или поблаго.

Веста за обвинението кон Заев предизвика вистинска „бомба“ во политичките кругови, но освен реакција од СДСМ немаше други позначајни официјални реакции. Меѓународната заедница во два наврати преку американски и германски претставници во земјава ја повика македонската влада да ги истражи содржините на телефонските разговори што ги презентира Заев на прес-конференции, и повика на оставки од страна на сите вмешани владини претставници во скандалот.