Лустрација и кога ќе се проветриме?

Лустрацијата на јавните функционери е доведена во прашање и постои можност таа воопшто да не се реализира и покрај тоа што Законот е донесен пред осум месеци. Лустрацијата досега не е имплементирана бидејќи Собранието се уште не може да собере сила да ја формира надлежната комисија, а сега стигнуваат и најави дека Законот е оспорен и пред Уставниот суд. Во судот веќе се пристигнати неколку иницијативи во кои се бара поништување или измени на делови од Законот. Најновата иницијатива доаѓа од штипската Секција за уставно право. Според нив, се работи за еден „сеирџиски закон“ од кој државата ќе има само штета и неговите решенија се тотално противуставни. Како пример за антиуставност се наведува дека со Законот се лустрираат само домашните тајни соработници и информатори, додека оние кои биле шпиони на странски разузнавачки служби практично се амнестирани. - Во иницијативата до Уставниот суд за поништување на овој антипатриотски закон нагласив дека тој не може да има повратно дејство бидејќи во однос на ретроактивноста тоа се прави само во случаи кога тој е поповолен за граѓаните - вели Панче Докузов, претседател на Штипската секција по уставно право. Во Уставниот суд потврдуваат дека е доставена ваква иницијатива и по барање на судот предлагачот и поднесителот веќе се изјасниле за спорните одредби и веќе е почната процедура за изјаснување на судот. Според иницијаторите за поништување на Законот, на Комисијата за верификација за факти и се даваат преголеми овластувања и таа практично ќе ја има улогата на паралелен Уставен суд. Професорот Стојмен Михајловскии смета дека со лустрацијата ќе се исправи една голема неправда, но предупредува дека секој случај е специфичен и затоа треба да се биде многу внимателен при неговата спроведувањето за да се постигне посакуваниот ефект. - Нееднаков пристап може да има во делот за лицата кои ќе бидат опфатени. Дејствувањето е исто, а тоа е давање информации во функција на одржување или рушење на некој режим и не треба да се прави разлика дали информаторите тоа го правеле по налог на домашни или странски разузнавачки служби - вели Михајловски. За Законот да почне да се спроведува неопходно е да се формира комисијата за верификација на факти која ќе треба да ги провери изјавите на сите вршители на јавни функции дека не соработувале со тајните служби во минатиот режим. Доколку комисијата открие нивна поврзаност, тие веднаш ќе треба да ја напуштат функцијата на која се наоѓаат и ќе бидат спречени да работат јавни функции и во иднина. - Не сум убеден дека Законот ќе се спроведе како што треба. Тоа најмногу ќе зависи од комисијата која е надлежна за негово спроведувањето. Премногу е широк кругот на лица што ќе бидат опфатени со овој Закон и тој ги опфаќа дури и членовите на верските заедници - вели Осман Кадриу, професор на Универзитетот ФОН. Од посткомунистичките земји најтемелна лустрација беше спроведена во Полска, каде што беа опфатени дури 700.000 луѓе, но и таму беа поднесени неколку иницијативи до Уставниот суд за оценување на законитоста. Судот во Полска оценил дека тој не смее да се употреби како одмазда за некои луѓе и дека не треба да биде селективен. Во земјите од регионот, иако речиси сите го имаат донесено, се судираат со големи тешкотии при неговото спроведувањето.

Bласта  го донесе законот за лустрација, кој не знам од кој причини воопшто не се спроведува!

Дали власта се плаши да го примени и јавно го објави списокот на кодоши и Удбаши во политиката, бидејки не е сигурна во минатиот труд на доста пратеници од сегашниот состав и владини функционери или пак се работи за уште еден закон кој е донесен ради реда, колку да се каже дека и Македонија има Закон за лустрација?

Јавноста, медиумите исто како и власта го заборавија овој закон, откако по големите негодувања од страна на одредени медиумски експонирани личности и по неговото изгласување, настапи тотален молк!

Што воопшто се случува со овој закон?

Дали навистина сакаме да се проветриме или пак се плашиме од настинки?