На Самитот на ЕУ на 28 јуни, Македонија ќе го доживее најголемиот пораз, поради алиби политиките на Владата и погубната популистичка политика, која ја доведе државата на најниските рангови на сите меѓународни скали за мерење на прогресот и демократијата. Залудни ќе бидат напорите на нашите поддржувачи кои срамежливо ќе се уверуваат самите себе дека ја имаат вистинската слика за состојбите во Македонија.

Да не се лажеме - резултатот од самитот е повеќе од очекуван. Сега веќе не е во прашање (единствено) името на државата во спорот со Грција, туку и реалните капацитети на институциите да направат реален исчекор напред под јаремот на партизираната и нефункционална администрација (којa треба да ги води преговорите по поглавја) и долгогодишното правно самоволие и беззаконие промовирано од позиција на моќ. Ако на ова се додаде енормното задолжување (наспроти економскиот раст), за реализирање на мегаломански проекти погодни за перење пари и корупција на високо ниво, тогаш резултатот е очекуван.

Слободата на медиумите, говорот, академската слобода (слободата генерално!), зачинето со сомнителните спонзорства, ја комплетираат сликата за политичката пропаганда и за манипулацијата во прилог на креирање розова слика за состојбите во државата внатре, но не и надвор...

По овој Самит на ЕУ, нема да има простор за промовирање на алиби политики засилени со пропагандата за вината на сите, само не за вината на Владата. Ќе им порачаме, да не се залажуваат дека овој пат својот политички неуспех ќе го затскријат зад етнонационалистичките и партиски политики, од кои народот ќе живее во страв од меѓуетнички судири, за да можат тие да се јават како единствени и најголеми спасители/чувари на националните интереси на државата и на Македонците.

 
Македонија со оваа власт е последниот бастион на квазидемократијата и на национализмот на Балканот, во функција на партиски/лидерски рејтинзи - овој бастион ќе го срушиме како кула од карти!

Граѓаните на Македонија сакаат искрени политичари, политичари кои ќе обединуваат и помируваат, а не што делат и караат; политичари домаќни, а не трошаџии и расипници; политичари кои ја разбираат маката на граѓаните, а не политичари кои ќе печалат изборни резултати и популарност; политичари кои ќе мислат за иднината на сите млади/деца, а не само за иднината на своите; политичари кои ќе знаат како да ја вратат довербата во институциите на системот, како народот да почне да им верува на судиите, лекарите, просветните работници, полицајците...

 
Мора да заврши времето на голи пароли за дела и реформи кога резултатите се видливи и опипливи - од нив народот почна да гладува, да питачи и да моли; да стравува за себе и да ги моли своите деца да заминат во туѓина. Патриотските пароли, јарболите и знамињата, бронзата и мермерот, верувањата и давањето лажни надежи не се јадат, со нив не се плаќа струја, парно, школарина, кирија, лекови, операции. Тие се само декор на квазипартиотските политики кои враќаат назад и држат во заложништво цел народ, за сметка на еден грст политички блефери кои играат на картата на националните интереси...

На крајот, народот е уморен од лаги! Народот ја сака вистината, зашто помалку ќе го боли вистината, колку и да е сурова, отколку да слуша лаги за добар живот што не го живее!

ПРЕВЗЕМЕНО ...

Невладината организација Транспарентност Македонија, во својот мајски извештај констатира дека продолжува трендот на непотизам, како битна карактеристика на владејачката гарнитура.

„Списокот на блиски роднини на високи функционери, кои се избрани или именувани на раководни позиции за последните неколку години, е импозантен. Еден од најновите случаи на непотизам претставува изборот на Влатко Илиевски, сопругот на министерката за внатрешни работи, Гордана Јанкулоска, за член на Одборот на директори на Македонска берза АД Скопје. И ова роднинско именување од највисоките ешалони на власта, како и стотици претходни, поминаа со молк од ДКСК, како надлежен орган за испитување на судири на интереси и евентуални коруптивни влијанија“, пишува во извештајот.

ТМ бара од Антикорупциксата комисија да утврди и да ја извести јавноста по која постапка и врз основа на кои критериуми е именуван сопругот на министерката за внатрешни работи, Влатко Илиевски, на оваа позиција и да одговори дали имало и други кандидати за таа позиција, како и како била водена постапката за неговото именување.

Ќе поскапат цигарите и алкохолот – Владата ги зголемува акцизите