Рецепти за солени јадења

Брокули со лук

Потребно:

* 400 г брокули
* 3 чешниња лук
* 50 мл масло
* 1 лажичка ѓумбир во прав
* 2 лажички нишесте
* малку сол
* 100 мл вода
* 1 лажица зачинал

Приготвување: брокулите исчистете ги, измијте ги и исечете ги на помали цветчиња. Бланширајте ги во вриена солена вода, во која сте додале 2 лажици масло, а потоа исцедете ја. Во тавче со дебело дно загрејте го остатокот од маслото, додадете ги брокулите, посипете ги со зачинал и кратко пропржете ги. Водата, нишестето и ѓумбирот измешајте ги, па додадете ги во брокулите. Уште малку смесата проварете ја и во неа ставете го истолчениот лук, а по потреба долијте уште малку вода.

Рагу од пилешко и домати

Потребно:

* 500 г пилешко бело месо
* 2 лажици масло
* 50 г кромид
* 300 г шампињони
* 400 г компири
* 300 г испасирани домати
* 1 лажичка зачинал
* сол
* бибер
* 1 лажица ситно сечкан магдонос

Приготвување: исечете го пилешкото на коцки и кратко пропржете го во загреаното масло. Додајте го ситно сечканиот кромид и уште кратко динстајте го сето тоа. Исечете ги шампињоните на четвртинки, а компирите на коцкички, па додајте ги во месото. Прелијте го сето тоа со вода за да ги покрие продуктите и во поклопено тенџере варете ги 15 минути на тивок оган. Потоа додајте ги испасираните домати, зачиналот, солта, биберот и варете уште 10 минути. Послужете го јадењето посипано со магдонос.

Телешко со грашок

Потребно:

* 600 г телешко месо од бут
* 150 г моркови
* 50 мл масло
* 1 главица кромид
* 100 мл бело вино
* 2 говедски коцки за супа
* магдонос
* 500 г грашок од конзерва
* 2 лажички нишесте

Приготвување: телешкото месо исечете го на коцкички и пропржете го во загреаното масло. Во него додадете го ситно сечканиот кромид, морковите исечени на коцкички и говедските коцки за супа. Сето тоа прелијте го со вода и динстајте го на тивок оган додека месото не омекне. Потоа, додадете ги виното, грашокот, нишестето разматено во малку вода и сето тоа уште малку динстајте го. На крај, во јадењето ставете го ситно сечканиот магдонос. Телешкото со грашок послужете го со пире од компири.

Похувани шницли

Потребно:

* 800 г свинско месо од бут
* 150 мл негазирана минерална вода
* 1 лажица зачинал
* сол
* масло за пржење
За панирање:
* 100 г брашно
* 3 јајца
* 100 г трошки

Приготвување: свинското месо од бут исечете го на шницли, па исчукајте го така што секоја шницла треба да има радиус од 20 сантиметри. Месото посолете го, посипете го со зачиналот и оставете го да отстои во негазираната минерална вода околу два часа. Потоа, шницлите исушете ги, испрпелкајте ги во брашното, па во изматените јајца и на крај во трошките. Пржете ги во загреано масло од секоја страна по околу три минути. Со похуваните шницли послужете парчиња лимон и салата од компири.

Палента со пармезан

Потребно:

* 600 мл вода
* 600 мл млеко
* 170 г пченкарно брашно
* 40 г рендан пармезан
* 40 г путер
За сосот:
* 2 чешниња лук
* малку крупна сол
* 60 г свеж босилек
* 100 г рендан пармезан
* 150 мл масло

Приготвување: измијте го босилекот и добро исушете го. Иситнете го во електричен сецко заедно со лукот. Посолете го и постепено додавајте го ренданиот пармезан. На крај сипете го маслото и мешајте додека не добиете компактна смеса. Зовријте ги водата и млекото, сипете го брашното и мешајќи, варете го 15 минути. На крај измешајте ги путерот, пармезанот и третина од сосот. Готовата палента послужете ја со остатокот од сосот.