Приватни или Државни факултети?

РЕВИЗОРИТЕ УТВРДИЛЕ НЕПРАВИЛНОСТИ НА ФИЛОЛОШКИОТ ФАКУЛТЕТ

Без никаков основ од студентите собрале над 110 илјади евра

Ревизорите утврдиле дека за 156 вработени по повод патрониот празник на Факултетот им е исплатен надоместок од 2.228 илјади денари заради реализација на многубројни работни обврски во текот на 2007 година

Филолошкиот Факултет "Блаже Конески", под раковоство на деканот Максим Каранфиловски, спротивно на Усогласениот ценовник којшто во согласност со Законот за високо образование е донесен од Советот за развој и финансирање на високото образование, од студентите наплатил 6.710 илјади денари како надомест за образовни и административни услуги и по основи коишто не се утврдени во Ценовникот или истите се наплатувани во повисок износ од утврдениот, утврдил Државниот завод за ревизија.
- Од студентите кои при упис во прва година уплатувале средства за прирачник, книжен фонд електронски индекс, биле собрани 2.214 илјади денари, додека од студентите од втора, трета и четврта година, кои плаќале за книжен фонд и солидарна одговорност се собрани средства во вкупен износ од 2.377 илјади денари. Од издавање на уверение за положени испити собрани биле 610 илјади денари, додека од уписнина за студенти кои што го изгубиле правото на студирање, се наплатени 758 илјади денари - забележале ревизорите.

Пари биле собирани и од доквалификација за наставна насока, во износ од 176 илјади денари, полагање контролен испит по странски јазик, во износ од 169 илјади денари, за бришење на квадрат, се наплатени 102 илјади денари, додека за заверка на семестар без два потписа 25 илјади денари. Од промена на статус на студент од редовен во вонреден, биле наплатени 246 илјади денари, а запишување или заверка на семестар после рокот, кеширани биле 33 илјади денари. Ревизорите утврдиле дека спротивно на Одлуката за распределба на средствата уплатени од странските државјани-студенти на Универзитетот Св.Кирил и Методиј" Скопје, според која 35 отсто од уплатените средства се распоредуваат на факултетите на кои студираат странските државјани, погрешно уплатените средства од пет странски студенти не се уплатени на сметката на Ректоратот, иако за истите лица е префрлена школарина за 2007 година, со што Факултетот неосновано остварил приходи во износ од 355 илјади денари.

- За изведување на подготвителна настава за приемен испит, што според Законот за високо образование и Статутот на Факултетот, не може да се подведе под високообразовна дејност на факултетот наплатувани се по 3.000 денари, поради што остварените приходи во износ од 255 илјади денари се неосновани - стои во извештајот на ДЗР.

Спротивно на Законот за извршување на буџетот кај Филолошкиот факултет Скопје утврдено е ненаменско трошење на буџетски средства во вкупен износ од 3.137 илјади денари. Ревизорите утврдиле дека за 156 вработени по повод патрониот празник на Факултетот им е исплатен надоместок во бруто износ од 2.228 илјади денари заради реализација на многубројни работни обврски во текот на 2007 година. За истите обврски на 18 вработени, односно на деканот, продеканите, секретарот на Факултетот, раководителот на отсек за сметководствено и финансово работење, раководителот на отсек за општи, правни и персонални работи, раководителот на отсек за студентски прашања и 10 вработени во Стручната служба на Факултетот, дополнително им се исплатени 375 илјади денари.