РАКОМЕТ - новости

САМО ЕДЕН ПОТВРДЕН ОДГОВОР НА БАРАЊЕТО ЗА ПРОШИРУВАЊЕ НА СУПЕР-ЛИГАТА

Вип и Струмица останаа прволигаши!

Единствена екипа која го поддржа барањето на двата клуба кои сакаа проширување на Супер-лигата е В.В. Тиквеш од Кавадарци.

Вип 2007 од Прилеп и Струмица следната сезона ќе играат во Првата лига. Нивното барање за проширување на Супер-лигата од 8 на 10 екипи не мина кај суперлигашите и тука завршуваат нивните шанси и надежи и следната сезона да играат во најсилната конк*ренција.

Овие два клуба побараа на конференцијата на клубовите да се прошири Супер-лигата. Барањето требаше да биде верификувано од сите суперлигаши за да се најде на дневен ред на највисокиот орган, Собранието на клубови.

Клубовите требаше да се изјаснат до вчера на пладне.

Услов беше сите клубови да се согласат. Ако само еден не се согласеше со идејата за проширување, предлогот немаше да оди на УО, па на Собрание. До вчера, значи кога истече официјалниот рок, потврда имаше само од еден клуб - Винарска Визба Тиквеш од Кавадарци. Ниту еден друг тим немаше пратено одговор. Останува отворено уште ден-два, ако евентуално некој испратил одговор по пошта, но епилогот нема да се промени. Договорот од конференцијата имаше и еден подуслов. Доколку не стигне одговор од некоја екипа, тоа значи дека одговорила негативно.

Иако беа свесни дека шансите за врќање во Супер-лигата им се теоретски, сепак, не можеа да го скријат разочарувањето во Струмица и Прилеп.

Прилепчани, односно нивниот тренер и еден од иницијаторите за оваа идеја, Томче Петрески, разочарано ги коментираше одлуките на клубовите.

"Разочаран сум од односот на клубовите. Знам дека не побаравме мала работа. Свесни сме, ние регуларно го загубивме суперлигашкиот статус и тоа е тоа. Јас разговарав со управите на клубовите. Имаше различни мислења. Ни беше јасно ставено до знаење дека лигата нема доволно квалитет за да се проширува. Имавме и поддршка од некои клубови. Не можеме никого со сила да натераме, ниту, пак, можеме да се лутиме на некого. Ќе продолжиме да соработуваме со сите. Но, морам да кажам: Не е фер што никој не одговори! Не н$ удостоија ниту со негативен одговор. Поинаку ќе беше доколку испратеа одговор и напишеа дека не сакаат проширување од тие и тие причини. Вака...", вели Петрески.

"Но, тоа е тоа. Неорганизираност, незаинтересираност... поради тоа и ваков е нашиот ракомет. Како и да е, ракометот во Прилеп нема да згасне. Ќе одиграме една сезона во Првата лига и ќе се вратиме на многу поголема врата. Сега ќе се организираме, ќе се подготвиме и ќе бркаме суперлигашки статус низ натпреварувањето. Екипата засега го носи името ВИП 2007, но преговорите за спонзорство се во финална фаза и ќе има промена на името", изјави Петрески.

Со ова завршуваат суперлигашките надежи за ВИП и Струмица. Дури и сите суперлигаши да одговореа позитивно, тоа немаше да значи официјално враќање во Супер-лигата. Предлогот ќе требаше да оди на усвојување прво на УО, а по тоа и на Собранието на клубови, па дури тогаш ќе се знаеше дали ќе има проширување или не.

ПРИЛЕПЧАНИ И СТРУМИЧАНИ (НАЈВЕРОЈАТНО) ЌЕ ОСТАНАТ ПРВОЛИГАШИ

Никој не одговорил на барањето за проширување

Екипата која со години беше позната како Т. К. Бренд од Прилеп и тимот на Струмица побара на конференцијата на клубови одржана на 3 август согласност од суперлигашите за проширување на Супер лигата и на тој начин да се пресели во најсилното натпреварување и условно кажано да ги спаси овие два ракометни центри од пропаст.

Клубовите треба писмено да се изјаснат до денеска, на пладне. Во случај некој клуб да не прати одговор, ќе се смета дека не го поддржува барањето за проширување на Супер лигата.

Струмичани и прилепчани би требало да почнат да се подготвуваат да ја одиграат оваа сезона како прволигаши. Договорот на конференцијата на клубовите беше до денеска на пладне да стигнат одговори, но доколку само еден клуб не прифати, тогаш пропаѓа целиот проект на овие два тима за враќање во елитата.

До вчера ниту еден суперлигаш немаше пратено одговор!

Дури и да соберат потписи со поддршка од сите суперлигаши, овие два клуба, сепак, нема да можат да влезат во Супер лигата. Одлука за проширување на лигите носи собранието на клубовите. Така, ова барање на двата споменати клуба фактички претставува барање за свикување на собрание на кое, доколку се согласат суперлигашите не би требало да имаат проблем да дојдат до посакуваното проширување.

Ваквото проширување не беше можно до пред некоја година. Имено, собранието може да донесе одлука за проширување на Супер лигата, но не за оваа туку за наредната сезона. Ова беше сменето во 2001 година, на собранието кое се одржа во Прилеп, во времето кога претседател на РФМ беше Душко Кадиевски. Тогаш беше сменето ова правило и лигата се прошири. Поточно беше направен компромис со екипите кои во тоа време штрајкуваа и тие кои играа.

Сеедно, прилепчани и струмичани денеска ќе знаат дали нивниот проект пропаѓа или дали ќе имаат шанса да играат во Супер лигата.

"ЦРВЕНО-ЦРНИТЕ" ПРЕЗАДОВОЛНИ ОД УСЛОВИТЕ НА ЗЛАТИБОР

Првата фаза е полн погодок

Екипата на Вардар Про е единствената екипа од Македонија која првата фаза од подготовките ја реализира во странство. "Црвено-црните" од 2 август се на Златибор и таму се подготвуваат за претстојните предизвици.

"Овде е прекрасно. Изненаден сум од сите услови, од салата, од сместувањето, од приемот. Временските услови се одлични, овде е 23 степени, идеално за работа, за оваа фаза од подготовките", коментира тренерот на скопскиот тим, Веселин Вујовиќ. "Доаѓањето овде го сметам за полн погодок и можам уште сега пријателски да му препорачам на директорот на репрезентацијата на Македонија да го има предвид кога ќе ја подготвува репрезентацијата", вели Вујовиќ.

Вардар во Србија отпатува со 18 ракометари, а единствен кој остана во Македонија е голманот Никола Митровски, кој треба да заврши со терапијата на колената.

"Имавме мал пех на стартот, Немања Прибак го исчанчи зглобот, но веќе почна да тренира и наскоро ќе биде во полн ритам. Мали проблеми имаат и Ракчевиќ и Симовиќ, но ништо сериозно. Друго... умор, тоа е. Но, сосема нормално е во оваа фаза од подготовките играчите да се жалат на умор. Договоривме контролен меч со Ц. Звезда и тоа ќе биде првата контрола за екипата", вели Вујовиќ.

Вардар по комплетирањето на базичната фаза на подготовките продолжува во БиХ и Словенија и ќе учествува на четири турнири, меѓу кои централното место го зазема турнирот во Добој, каде ќе игра со Нордхорн и Иври во рамките на групата.



ВАРДАР ПОБЕДИ НА ПРВАТА КОНТРОЛА

Денот, по утрото се познава

ВАРДАР ПРО - Ц. ЗВЕЗДА 29:27 (14:15)

Екипата на Вардар Про ја забележа својата прва победа во новата сезона. На контролниот натпревар кој го одигра со белградска Ц. Звезда, Вардар победи со два разлика. Минимална предност на полувремето, имаше белградскиот тим.

ШУНДОВСКИ ТРЕТ ДЕН ГО ПОДГОТВУВА ТИМОТ ЗА СТАРТОТ НА ЛИГАТА НА ШАМПИОНИТЕ

Металург зема залет од Маврово

Екипата на Металург во полн состав ги почна подготовките за наредната сезона во која ќе имаат комплицирана задача во битката со засилениот Вардар Про да ја одбранат титулата и уште покомплицирана, во Лигата на шампионите да парираат на двете најпознати европски екипи, Кил и Барселона. Нормално, со услов да го елиминираат турскиот шампион Измир во квалификациите за Лигата на шампионите.

Металург на Маврово работи на физичката подготвеност, по што ќе замине на гостување во Словенија каде се планирани неколку натпревари.

Нема да имаат многу време ракометарите на Металург за подготвување. Првенството почнува по еден месец, а тоа што ја прави незгодна целата работа е што веќе на стартот, прво ќе мораат да играат со споменатиот Измир и веднаш по тоа со Вардар Про. Исто како и лани, веќе во првото коло од националното првенство.

Екипата претрпе неколку измени сезонава. Замина Гоце Макалоски, тој ќе игра во Вардар, а во обратна насока стигна Владо Недановски. Замина голманот Славиша Стојиновиќ, а на неговото место пристигна добро познатото име, Данило Брестовац.

Уште во текот на сезоната заминаа Иван Телепњев и Левко Наумоски. Место нив нема нови играчи. Филип Шчепановиќ веќе потпиша за Ц. Звезда, а на неговата, односно позицијата десен бек дојдоа Милош Ивановиќ и Сергеј Погорелов.

Последниот новитет беше доаѓањето на десното крило Александар Јовиќ од Вардар.

"Засега сме во овој состав, но ќе видиме како ќе биде. Нормално дека нема да прогласиме крај на преодниот рок. Ќе видиме како ќе течат подготовките и ќе реагираме навреме доколку за такво нешто се покаже потреба", вели претседателот на клубот, Ристо Чокрев.

Металург и натаму во комбинација ги има двата бека на репрезентацијата на Египет, но дали ќе има можност тие да дојдат, ќе се знае по завршувањето на Олимписките игри во Пекинг. И двата ракометари се дел од тимот на "фараоните" кој ќе игра на Олимпијдатата.

"Засега с$ си оди нормално. Работиме главно на физички план. Знаеме колку искушенија н$ чекаат и свесни сме дека мораме уште веднаш, на стартот да достигнеме топ форма", вели пикерот Горан Ѓоргоноски.

Тимот засега тренира по двапати на ден. На Маврово ќе остане вкупно 10 дена.

СО НОВА ОПРЕМА ВО ЛШ

Ереа место Најк

Металург следната сезона ќе биде облечен во опремата на италијанската фирма "Ереа". Досега суперлигашот од "Автокоманда" носеше опрема на познатиот "Најк", но годинава ќе ги носи продуктите на фирмата која ги снабдува фудбалските тимови на Мидлсброу, Аталанта, националниот тим на Шкотска итн. Поголемиот дел од опремата веќе е пристигнат и се користи на подготовките, с$ ќе биде комплетирано наскоро, кога веројатно и официјално ќе бидат промовирани.

ЖЕНСКАТА ЕКИПА ГИ ПОЧНА ПОДГОТОВКИТЕ

И Металург Скопје во погон

Паралелно со машкиот тим и женската екипа на Металург Скопје ги почна подготовките за следната сезона.

Оваа екипа сезонава се враќа во Супер-лигата и има план во следните неколку години да стане тим за почит, пред с$ во поглед на начинот на кој ќе биде организиран, а соодветно со тоа треба да доаѓаат и резултатите.

"Не сакаме да се излетуваме премногу. Клубот мора да се развива чекор по чекор. Играчкиот кадар за оваа сезона ќе биде комплетиран до крајот на неделава. Подготовките ќе се одвиваат во Скопје. Натпревари ќе играме во втората фаза од подготовките. Сигурно ќе заминеме во Србија, но уште немаме дефинирано каде и со кои екипи ќе имаме контролни натпревари", вели Крсто Петрушевски.

Најавите околу женскиот тим беа далеку поамбициозни, но главно темелени на чаршијата.

"Оваа сезона целта е да бидеме стабилни во првенството. Нормално, секое место погоре ќе биде поубаво. Но, главно е организациски с$ да биде поставено на свое место, за да може подоцна клубот правилно да се развива. Немаме намера веднаш да се залетуваме со бркање резултати. Доколку се работи правилно, тие сами ќе дојдат", вели Томе Треневски, претседателот на спортското друштво Скопје.

СТАРТУВАШЕ ЖЕНСКИОТ ВИЦЕПРВАК

Кале почна со подмладен тим

Женскиот вицепрвак, екипата на Кале Кичево, почна со подготовките за наредната сезона. За кичевскиот клуб, кој во минатиот период за кратко имаше финансиски проблеми, најважно беше да се почне.

Играчкиот состав беше познат помалку или повеќе уште пред да стартуваат. Измени има на голманската позиција. Дијана Наумоска замина во Грција, а на нејзиното место доаѓа Билјана Николовска, која лани беше член на Фон Универзитет од Струга.

Замина и Весна Ацковска, а дојде Ивана Маневска. Тоа се познатите измени, останува да се причека деновиве и конечната разврска по прашањето дали и Мирјана Грчевска останува или и таа ќе замине.

Следната сезона во Кале одново ќе игра Робертина Грујоска, која лани накратко замина во Турција, во екипата на Ускудар.

Тоа е помалку повеќе с$ што се однесува до играчкиот кадар. Планот на подготовки е екипата да се подготви физички во Кичево, а по тоа заминува на турнир во Бугарија.

Турнирот ќе се одржи во Варна од 15 до 17 август, а ќе учествуваат Локомотив, кој е и домаќин, Кале Кичево, екипата на Ускудар, вицешампион на Турција и тим каде игра македонската репрезентативка Билјана Црвенкоска. Би требало да учествува и една романска екипа.

По тоа екипата продолжува со подготовките во Македонија, тука сигурно ќе бидат одиграни неколку натпревари, а можно е да се оди на кратко гостување и во Србија.

"Немаме амбиции како минатите сезони да бидеме втори по секоја цена. Докажавме што требаше, сега имаме малку поинакви амбиции. Нормално, ќе се бориме за второто место, но тоа нема да биде со посебен притисок. Најважно ни е играчите во кои вложувавме минативе години да добијат шанса да играат во првиот тим. Имаме неколку помлади ракометарки кои ги сметаме за наша иднина и тие ќе треба да се докажуваат годинава", изјави Коџаџиклиоски-Масаро, директорот на екипата на Кале Кичево.
Кале Кичево е македонски претставник во Купот на ЕХФ. Таму во второто коло ќе игра со вицешампионот Кикинда, екипа во која од оваа сезона ќе настапува и македонската репрезентативка Тања Андрејева, поранешен голман и капитен на Кале Кичево.

МАШКИОТ ТУРНИР НА ОЛИМПИСКИТЕ ИГРИ ВО КИНА ЌЕ БИДЕ НЕВЕРОЈАТНО СИЛЕН, А КОНк*рЕНЦИЈАТА ЗА ЗЛАТОТО Е ГОЛЕМА

Шест селекции со еднакви шанси

Вкупно 12 репрезентации од недела ќе почнат со трката за златниот медал на Олимписките игри во Пекинг во машка конк*ренција каде што трофејот го брани селекцијата на Хрватска.

На оваа Олимпијада постои голема израмнетост меѓу репрезентациите, а дури шест од нив имаат состав кој може да дојде до златниот медал на крајот на турнирот. Многу е тешко да се процени кој состав има поголеми шанси, но факт е дека се работи за шест селекции од Европа и сите се во кругот на кандидати за највисокото место на тронот.

Финалето од пред четири години во коешто играа Хрватска и Германија с$ уште е во сеќавањата на сите вљубеници во ракометот. Неизвесниот дуел кој се решаваше при крајот го разубави целиот турнир кој донесе квалитетна игра.

Сепак, она што беше тогаш сега сигурно ќе биде уште посилно и поквалитетно бидејќи има многу посилни репрезентации. Покрај финалистите од пред четири години големи надежи за место во финалето има и кај составите на Данска, Франција, Шпанија, Полска...

Сите шест селекции имаат медали на големите натпреварувања од Олимписките игри во 2004 година наваму. Сите имаат и состави во кои има голем број ѕвезди. Сето тоа покажува дека овој турнир ќе биде на рамниште на Европските и Светските првенства и токму поради тоа заслужува да се следи во текот на целиот шампионат.

Репрезентациите се поделени во две групи од по шест селекции. По секое коло ќе има по ден одмор, а по завршувањето на средбите по групи ќе се игра четвртфинале така што за да се стигне до златото ќе биде потребно да се одиграат по осум натпревари.

ГРУПА "А"

Хрватска

Шпанија

Франција

Бразил

Полска

Кина

ГРУПА "Б"

Русија

Исланд

Германија

Кореја

Данска

Египет

ДОСЕГАШНИ ПОБЕДНИЦИ

1936 Германија

1972 Југославија

1976 СССР

1980 Германија

1984 Југославија

1988 СССР

1992 ЗНД

1996 Хрватска

2000 Русија

2004 Хрватска

Бронзените од Атина, во споредна улога

Пред четири години Русите успеаја да завршат на 3. место, но по тоа формата на оваа селекција редовно се движеше по надолна линија. Токму поради ова Русија не е репрезентација која се смета како фаворит за врвот и затоа се наоѓа во групата на селекции кои ќе се обидат да изненадат. Во таа група се и: Исланд, Бразил, Египет, Кина и Кореја.

ХРВАТСКА

Светското првенство во прв план

Ако кажеме дека Хрватска има редица на повредени ракометари нема да кажеме ништо ново бидејќи тоа е нешто кое веќе сме навикнале да го слушаме пред големите натпреварувања за оваа селекција. На малиот Иван Чупиќ му беше ампутиран прст на левата рака. Џомба и Метличиќ имаа операции пред почетокот на подготовките. Балиќ доби незгодни удари на последните контролни средби...

Едноставно, селекцијата која ја брани титулата од пред четири години има многу проблеми. Селекторот Лино Червар не може да смета на 100% подготвени ракометари и тоа е причина да не може со сигурност да се каже какви се шансите на овој состав на игрите.

Сепак, предноста на Хрватска е тоа што оваа репрезентација во ист состав игра заедно веќе подолг период. Токму поради тоа кога е во прашање овој тим ништо не може да се предвиди туку најдобро е да се почека и да се види како ќе тргнат работите.

"Нашата главна цел е Светското првенство на кое сме домаќини на почетокот на следната година. Олимписките игри се дел од тој проект и затоа главното од нас ќе следи во јануари", вели Гобац, инаку одговорниот за машките селекции во Хрватска.

ГЕРМАНИЈА

Тешка задача за ново финале

Хајнер Бранд смета на најсилниот состав за игрите, но има еден проблем кој се случи прет тргнувањето за Кина. Ларс Кауфман го поврди мускулот на левата нога и поради тоа мора да мирува извесен период.

Неиграњето на Кауфман секако ќе измени дел од тактиката на германскиот селектор бидејќи тој е еден од оние коишто имаат квалитет да помогнат и во одбраната и во нападот. Воедно беше еден од подобрите на последните контролни средби.

И покрај повредата на овој ракометар, Бранд има одличен тим кој на овие игри ќе биде предводен од голманите Фриц и Битер, а во тимот ги имаат и искусните Шварцер и Керман така што Германија има голема шанса да успее да стигне барем до финалето.

Инаку, Германците почнаа лошо на контролните средби, а потоа продолжија во добар стил и постојано го креваа квалитетот на играта. Тие се освојувачи на среброто од пред четири години и затоа за очекување е на овој шампионат да стигнат до нов висок пласман.

ДАНСКА

Атак на уште едно злато

Составот кој на почетокот на оваа година успеа да дојде до титулата на Европското првенство, сега ќе се обиде да стигне до нов пехар, но од Олимписките игри.

Каспер Хвидт е главниот адут на Данците на игрите во Кина бидејќи тој е еден од најстандардните во оваа репрезентација. Данска има и одлична предна линија. Пивотот Кнудсен е еден од најдобрите во светот, но и еден од специјалистите за одбранбени задачи. Крилото Ларс Кристиансен веќе со години е меѓу подобрите на својата позиција.

Бековската линија ги има истите ракометари како и на шампионатот од јануари. Тука се: Спелерберг, Боесен, Болдсен... како и специјалистите за одбрана Јоргенсен и Нилсен. Сето ова го прави тимот на Данска еден од фаворитите за трофеј и секоја селекција која ќе игра со овој состав ќе има потешкотии.

ФРАНЦИЈА

Карабатиќ ги предводи "триколорите"

Селекцијата на Франција на Олимписките игри ќе биде предводена од двајцата најдобри ракометари: бекот Никола Карабатиќ и голманот Тиери Омејер. Тоа се главните адути на "триколорите" коишто и во Пекинг гледаат свои шанси да дојдат до првото место.

Според многу оценки токму Французите заедно со Данците треба да го водат главниот збор на теренот и од нив ќе се очекува да дојдат до пласман во финалето на игрите. Неизвесно е дали ова ќе може да се оствари бидејќи можно е овие две селекции да се сретнат и пред финалето, но факт е дека од нив ќе се очекува многу.

Победата над Шпанија од 33:29 пред некој ден е само показател дека Франција е во добра форма и на теренот во Пекинг ќе има што да покаже.

ШПАНИЈА

"Фуријата" чека на искусните

Баруфет, Хомбрадос, Ромеро, Ентрериос, Лозано, Гарабаја... Тоа се само дел од имињата на ракометарите коишто ќе играат на Олимписките игри за "црвената фурија".

Имаа слаба форма во последните неколку натпревари и не го прикажаа она што сите го очекуваа. Токму поради тоа е неизвесно каква е силата на Шпанците пред одигрувањето на средбите на игрите во Пекинг.

Факт е дека никој нема да може да се наигра против нив, но и дека нема да можат лесно да дојдат до место во завршницата и борбата за медалите.

Шпанците овој пат ќе се обидат со искуството да дојдат до што е можно повеќе бодови во првата фаза, а потоа и до пласман во полуфиналето.

Во секој случај тоа што селекторот може да смета на сите ракометари е доволен показател дека Шпанија има сили за највисок дострел.

ПОЛСКА

Состав кој може да изненади

Селекцијата која во јануари 2007 година на Светското првенство дојде до сребрениот медал е подготвена за настап на игрите во Кина. Речиси истиот состав со мали измени е повторно на теренот.

Билецки, двајцата Лијевски, но и двајцата Јурецки заедно со Ткачик и Јурасик се адутите на Полска на овој шампионат. Сите погледи се свртени кон овие ракометари кои доколку успеат да ја повторат играта која ја прикажаа пред нешто повеќе од 18 месеци ќе можат да се надеваат на место во завршницата.

Во споредба со другите пет селекции Полска најниско на скалилото заедно со Шпанците, но тоа не мора да значи ништо бидејќи прогнозите се едно, а вистинската слика на теренот нешто сосема друго.

Изменето од blueprayer - 06.Август.2008 во 16:29

МВП ИГРАЧОТ НА МУНДИЈАЛОТ, ЖЕЛБА НА МАКЕДОНСКИОТ ПРВАК

Кометал ја бара Хана Гвон

Плејмејкерот на репрезентацијата на Кореја, Хана Гвон е ракометарката која Кометал радо би ја видел во своите редови следната сезона. Веќе стапи во акција македонскиот шампион и во наредните денови треба да има повеќе детали.

Хана Гвон беше прогласена за МВП на мундијалот кој се одржа во Македонија и целосно го заслужи ова признание. Дури и статистички, Гвон е на првото место во најценетиот елемент, комбинацијата на голови плус асистенции со 103 реализирани пасови, односно голови. Поединечно има постигнато 57 гола (4. место) и 46 пати асистирала (3. место).

Кометал веќе контактирал со Корејката, разменети се првите мислења, но премногу е рано да се прогнозира како ќе се одвива целата работа и дали има реални шанси таа од есен да игра за македонскиот првак.

"Имавме многу желби од овој шампионат, но тешко оди реализацијата на трансфери. Најзаинтересирани сме за Хана Гвон од Кореја. Таков играч ни е и тоа како потребен во нашиот тим. Стапивме во контакт, имавме прелиминарен разговор и ќе видиме како ќе се одвива сето ова", изјави претседателот на Кометал, Иван Бојков.

Има уште позиции во Кометал покрај центарската кои треба да бидат пополнети или засилени, но во моментов нема од клубот конкретни имиња.

ЖЕНСКАТА ЈУНИОРСКА РЕПРЕЗЕНТАЦИЈА НА МАКЕДОНИЈА ЗАВРШИ СО НАСТАПОТ НА СВЕТСКОТО ПРВЕНСТВО СО ПЛАСМАН НА 18. МЕСТО

Ова е реалноста во моментов

Репрезентацијата на Македонија го заврши настапот на Мундијалот како најслабопласирана европска селекција.

Македонија во моментов е 18. селекција во светот. Ова е факт којшто никој не може да го демантира, никој не може ниту да го избрише или да го поправи со некакво објаснување или оправдание. Тоа е реалноста на која ситемораат да & погледнат во очи и што побрзо да го најдат проблемот бидејќи така ќе можеме да продолжиме напред.

Пред почетокот на првенството никој не постави барање од оваа генерација дека таа мора да дојде до медал. Никој не рече ниту дека репрезентацијата на Македонија мора да биде и меѓу првите осум. Едноставно девојките живееја во некој сон според кој очекуваа да се пласираат дури и во финалето. Веруваа во себе, но не беа свесни дека другите селекции имаат одлични тимови коишто со години наназад играат заедно и имаат голем број контролни средби.



И сега откако е с$ завршено, а се пласиравме дури на 18. место многу е тешко да кажете дали ова е неуспех и разочарување или овој резултат е само една реалност на младинскиот ракомет во Македонија.

Сите ние очекувавме барем едно. Самите ја избравме групата и токму поради тоа сметавме дека вториот круг ни е загарантиран. Пласманот во овој втор круг за нас ќе беше голем успех и веќе по првата недела ќе кажевме дека сме го добиле она што сме го посакувале од оваа генерација и далеку поопуштено ќе ги следевме средбите.

"Првенството го почнавме со добра игра, но на крајот с$ излезе на лошо. Се најдовме дури на дното. Дали е тоа резултат на неискуство или е во прашање нешто друго... По средбите во Охрид имаше некој психолошки пад и беше многу тешко да ги вратиме назад девојките. Се виде на последниот меч против Кинески Тајпеј дека тие сакаа да играат, но не знам што се случи. Дали е толку силата? Дали е тоа неискуството? Турнирските средби? Едноставно не знам. Девојките се бореа. Даваа максимум, но... се виде дека тоа не е доволно. Ќе мораме многу да работиме за да успееме да постигнеме еден европски квалитет на ракомет. Во секој случај сето ова беше едно големо искуство за сите бидејќи одигравме многу меѓународни натпревари. Се гледаше разликата меѓу репрезентациите коишто настапија на ова Светско првенство и нас. Другите имаа многу повеќе натпревари пред да дојдат во Македонија и тоа им помогна многу да ги остварат своите амбиции", вели селекторот Георгиевски.

Нештата тргнаа по надолна линија уште во првиот круг кога игравме во Охрид. Првата средба против Австралија покажа дека Македонија ќе има многу проблеми за да стигне до втората фаза. Ни требаа 40 минути за да влеземе во шема, но тоа ни остана единствена победа. Следуваа Кореја, Хрватска, Бразил... Три порази кои ги преселија девојките. Во саботата, на 26 јули кога сите очекуваа забава за прослава на пласманот во вториот круг тие ги пакуваа куферите за пат кон Гевгелија.

"Во Охрид сите видоа што се случуваше. На мечот со Бразил доколку бевме посталожени можевме да дојдеме до посакуваниот резултат. На полувремето реков дека имаме да издржиме уште 30 минути. Беше важно да го победиме Бразил за да останеме меѓу тие 12 селекции. Сепак, не успеавме во тоа и по овој меч с$ се сврте наопаку. Имаше и проблеми со повреди, па сето тоа одеше против нас. И поразот против Бразил веројатно беше шок за сите и делуваше разочарувачки бидејќи овие деца, сепак, се недоволно искусни. Тие не се научени на одговорност и на вакви големи натпревари".



Имаше премногу грешки. Пропусти во одбраната, загубени топки во нападот. Она што ќе го направевме во десетина добри минути го губевме во продолжението кога влегувавме во криза и никако не успеававме да продолжиме во ист стил.

"Го плативме данокот на неискуството. Оние селекции кои останаа во кругот за највисок пласман се далеку посилни и со многу повеќе турнирски натпреврувања и контролни средби. Се гледаше од начинот на којшто играа. Ние 'кикснавме' бидејќи немавме доволно средби пред почетокот на првенството. Можеби девојките имаа страв и од самата публика, па имаше и многу технички грешки. Како пример може да послужи и фактот што во втора минута не одиш на брз центар, а во 55 минута с$ уште можеш да трчаш. Тоа беше психолошки момент. Јас постојано им велев дека можат. Тие играа подобро во второто полувреме, но дури откако ќе почнеа да губат. Дури тогаш се опуштаа и почнуваа да играат. Ние секогаш одевме на победа и така се мотивиравме без разлика што противниците беа посилни од нас. Имаше преголем стрес од преголема одговорност. Со Бразил имавме четири зицери пред крајот со кои можевме да го решиме тој меч и да победиме. Успеевме ли да победиме с$ ќе беше подобро. Вака загубивме и с$ почна да оди надолу и веќе немаше доволно мотив и играта беше сосема различна", заврши Георгиевски.

И сега откако веќе завршија двете напорни недели во кои имаше и многу квалитетни натпревари, нам ни останува да извлечеме поука и грешките да ги поправиме веќе при следните квалификации на јуниорките за некое друго првенство. Квалитетот дефинитивно го имаме, но тој не може да дојде до израз преку ноќ. Треба некој да го извлече најдоброто од овие девојки, а тоа може само преку добра и квалитетна работа во клубовите.

Иднината е пред нас. Само таа може да ни покаже дали знаеме како да ги поправиме грешките!



Многу проблеми со повреди

Во текот на целиот шампионат репрезентацијата на Македонија имаше проблеми со повреди. Елена Георгиевска ја повреди тетивата на два дена пред стартот на СП. Елена Димковска, која беше во составот за првиот круг, воопшто не настапи поради повреда. Ивана Петковска го свитка зглобот на тренингот пред мечот со Кореја. Елизабета Стојановиќ се повреди на средбата против Бразил. Георгиевска во вториот круг имаше проблеми со стомачен вирус. Голманката Фросина Крстевска ја свитка ногата на загревањето пред средбата со Казахстан. Сето тоа влијаеше многу на играта на репрезентативките.

Нов демант за "девојки од улица"

При последниот коментар за случувањата на Светското првенство Георгиевски уште еднаш се обиде да објасни што сакаше да каже со својата изјава "девојки од улица" за која многу се коментираше во медиумите.

"Дојде до едно недоразбирање. Сакав да кажам општо за целата ситуација бидејќи ние цело време така изгледавме на теренот, но бев погрешно сфатен. Е сега ние сакаме од некоја девојка да биде технички дотерана. Се знае дека во Македонија некои клубови немаат воопшто услови. Некои тренираат во школски сали. Сето тоа беше кажано во тој смисол, а не за да ги нападнеме девојките. Сепак, поради овие девојки и ние бевме овде. Доколку не беа тие немаше ниту ние да бидеме на тоа место. Затоа, сакав да го демантирам тоа за да не се сфаќа погрешно. Девојчињата се тие и не можеме да бараме преку леб погача", вели Георгиевски.

Можевме многу повеќе

Откако заврши и последниот дуел на овој шампионат, левото крило на репрезентацијата на Македонија, Ива Стојковска, која има право да игра уште две години за јуниорките, го кажа своето видување за постигнатото.

"Можевме да направиме повеќе на овој шампионат. Сепак, мислам дека неискуството си го направи своето. Не бевме доволно ангажирани на натпреварите. Не го дадовме и максимумот. Паднавме премногу по дуелот со Бразил и сето тоа н$ чинеше пласман на 18. место", вели Стојковска.

Стојковска причините повеќе ги гледаше во психолошката подготвеност на сите ракометарки.

"Сметам дека физички бевме премногу подготвени. Меѓутоа, отидовме предалеку кога мислевме дека ќе ја победиме Кореја. Потоа дуелот со Бразил, кој ни беше билет за втор круг. Паднавме психолошки, па потоа игрите н$ однесоа само до 18. место. Мотивот ни падна премногу по мечот со Бразил бидејќи очекувавме победа. Не бевме свесни додека не се најдовме на теренот во Гевгелија. Мислевме дека Алжир ќе го добиеме со многу голема разлика, па преопуштено излеговме на терен, што ни се одрази на резултатот и одигравме нерешено".

Според неа во ваква ситуација не може да издвои некој кој е посебно виновен за ваквиот пласман на Македонија.

"Никој не е виновен. Нема некој што е посебно виновен за резулатот. Сепак, секогаш може да се одигра подобро и повеќе од она што го прикажавме. Меѓутоа, мора да се има предвид дека немавме контролни средби. Другите репрезентации имаа педесетина натпревари, а ние не знаевме каде ни се грешките", заврши Стојковска.

Еден од најслабите пласман на домаќините

Македонија со освојувањето на 18. место стана земја која има еден од најслабите пласмани на Светските првенства, а била домаќин на истиот шампионат. Досега на првенствата каде што играле 20 селекции немало послаб пласман за домаќинот бидејќи претходно Чешка беше на 16. позиција. Единствено тука споредба може да се прави со 1997 година кога Брегот на Слоновата Коска беше претпоследен, но тогаш играа само 17 селекции.

Ракомет: Јуниорките 18-ти

Македонските ракометни јуниорки се пласираа на разочарувачкото 18-то место во конк*ренција на 20 земји учеснички на Светското првенство во нивната возрасна категорија што се одржува во земјава.

Лошиот настап на мундијалот го завршија со уште еден пораз, вкупно петти во осмиот натпревар што беше круна на лошите изданија на шампионатот.

Денеска во Скопје загубија со 26:25 од селекцијата на Кинески Тајпеј, во борбата за 17-та позиција на конечната табела.

Катастрофално, но послаби од нив на планетарниот светски младински ракометен собир се само две репрезентации.

Пласман од 13 до 20 место:

13 место

Исланд - Јапонија 27:26

15 место

Словенија - Алжир 33:27

17 место

Македонија - К. Тајпеј 25:26

19 место

Казахстан - Австралија 32:22