Одговор:

Можно е да станува збор за едно од следниве три работи. Едната можност е дека вашата мачка има паразити. Тоа можете да го проверите со тоа што ќе отидете во Лабораторијата за паразитологија и паразитарни заболувања при Факултетот за ветеринарна медицина во Скопје, каде што ќе се провери изметот на мачката и, откако ќе се утврди дали и каков паразит има вашата мачка, ќе ѝ се пропише соодветна терапија. Доколку досега ја немате прочистено мачката од паразити можете сега тоа да го направите.

Втората опција е дека слабоста на вашата мачка е резултат на тоа што пред еден месец таа имала еструс (полов циклус). За време на половиот циклус мачките трошат многу енергија, а во исто време не покажуваат многу интерес за јадење. Ако по завршувањето на нејзиниот циклус мачката продолжила да јаде нормално, тогаш за некое време таа ќе си ја врати тежината на нормала, освен ако повторно не влезе во циклус. Доколку се решите да ја стерилизирате и помалата мачка, тогаш таа веќе нема да троши толку енергија поради тоа што веќе нема да влегува во циклус и дури ќе почне да качува тежина.

Третата опција е дека вашата помала мачка не стига да го изеде својот дел од храната поради тоа што постарата веќе го изела и нејзиниот дел (рековте дека постарата изгледа како да има вишок тежина). Ова можете да го проверите со тоа што ќе ги храните двете мачки одвоено. Ако помалата мачка си ја изеде храната и понатаму продолжи да биде слаба, тогаш станува збор за некој друг проблем.

Проверете ги овие работи, а доколку вашата мачка и понатаму остане слаба, тогаш однесете ја на ветеринар за подетални анализи.