Учебници-многу скапи, бесплатни...

„Хомосексуализмот и лезбијството се негативни појави во сексуалниот живот на човекот и значајни општествени проблеми кои треба да се искоренат“. „Учесниците во таков изопачен, неприроден и што би рекле ненормален сексуален живот, се личности со психички потешкотии и пречки“. Вакви формулации за сексуалната определба кај човекот се наведени во учебникот по педагогија за трета година, гимназиска насока. Тие се спротивни на заложбите на Светската здравствена организација, со кои се налага дека хомосексуалноста не смее да се третира како проблем, а Законот за антидискриминација кој Македонија треба да го донесе, како услов за приближување до европското законодавство, строго забранува промовирање стереотипи и стигматизирање на ранливите општествени групи, меѓу нив и на популацијата ГЛБ. „Хомосексуализмот и лезбијството се варијанти на полов нагон и секако како опачини се манифестираат со свртеноста на индивидуата кон сексуален партнер од ист пол. Тоа може да биде присутно и кај мажите и кај жените, но, сепак, кај жените е поретка појава. Меѓу така ориентираните лица и во двата пола има многу невротични и психотични личности“, пишува во учебникот кој е дело на авторите Ели Маказлиева, Анета Бараковска и Марија Костова. Ирена Цветковиќ, активист за човекови права, смета дека овој учебник во најскоро време треба да биде исфрлен од употреба затоа што се забележува високо ниво дискриминација врз основа на сексуалната ориентација. Според неа, ниту една од тезите не е научно потврдена, туку тоа се голи дискриминаторски ставови на авторите со кои се индоктринираат младите генерации- Ова не е прв случај на дискриминација во образовниот систем. Страшно и ужасно е што вакви примери ќе најдете во многу учебници за основно и за средно образование. Тоа се ставови спротивни на сите меѓународни документи и договори кои нашата држава ги има потпишано и е задолжена да ги спроведува принципите кои во нив се заговараат. Хомосексуалноста, според Светската здравствена организација, не спаѓа во листата на болести. Таа не е психичка потешкотија, ниту пречка туку сексуална ориентација исто како што е и хетеросексуалноста - вели Цветковиќ. Според Жарко Трајановски, експерт за човекови права, кој докторирал токму на правата на популацијата ГЛБ, вели дека учебникот е доказ дека кај нашата стручна јавност постои хомофобија, а таа сега покрај во медиумите се шири и во образовниот систем. Македонија се уште нема донесено закон за антидискриминација, иако тоа е една од обврските во преговорите со Европската унија. Беше подготвен предлог-закон, но од стручната јавност беше оценет дека има многу недостатоци и сега се подготвува нова верзија. Мирјана Најческа, претседателка на Центарот за човекови права, вели дека дискриминацијата врз основа на сексуална ориентација е манифестација на негативните трендови поврзани со глобалната стратегија на актуелната власт за промоција на традиционалните и религиозните вредности. - Законот против дискриминација сигурно ќе биде донесен како дел од барањата на ЕУ во процесот на асоцијација на нашата држава, меѓутоа, како ќе изгледа, кои заштитни механизми ќе ги нуди и дали нема да се претвори само во уште едно парче хартија без никаква употребна вредност, станува основна за грижа на промоторите на човековите права и слободи - вели Најческа.