“Антиквизација“ или кому му пречат нашите корени?!

Дел од нашата интелектуална и политичка елита во последно време ни скова еден термин “антиквизација“ или “букефализација“, како погрден термин кој ќе се користи за опфаќање на се’ она што се нарекува потрага по нашите антички корени.

Сведоци сме дека дел од таа “елита“ не бира средства и зборови со кои ќе нападне се што има некаква врска со антиката, со политиката на поставување споменици, со интензивирање на археолошките истражувања, именување на објекти според имињата на историски личности, па некои од нив одат и до таму да сопствениот народ кој изразил интерес за своите историски корени да го наречат пациент, заразен со антички вирус, македоноиди, психијатриски случаи, болно племе...

Во исто време, чудно и симптоматично ми е што, во меѓувреме додека се ова се прави, никој никаде не се одрекол од своите словенски елементи во потеклото и дека ги негирал или оспорил нашите историски личности од словенскиот период.

Па зошто тогаш ова копање по нашето минато толку многу им пречи на овие господа? Зошто се дрзнуваат така безобразно да плукаат по него и да се потсмеваат со овој дел од нашата историја, омаловажувајќи го на секој начин нашето културно, историско и цивилизациско наследство?