Федерализација на Македонија?!!!

Невзат Халили, кој најави референдум за политичка и културна автономија на Албанците во Македонија, вчера се промовираше како претседател на „Република Илирида“. Во соопштението испратено до редакциите на медиумите на албански јазик, Халили нагласува дека „Република Илирида“ ќе биде дел на идната унија во која ќе влезе и Македонија.

Тој во соопштението ја обвини министерката Гордана Јанкуловска дека ја продолжува антиалбанската и антидемократска традиција, која била спротивна на соживотот.

„Ги информирам сите институции во земјава и меѓународните претставници дека изјавата на Јанкуловска за барањето обвинителството да се занимава со мене и со оние што ја потпишаа иницијативата за Илирида, не е ништо друго туку продолжување на старата антиалбанска традиција. Никој и никогаш не можел да ѝ суди на волјата на еден народ“, соопшти Халили.

Тој ја обвини Македонија дека не го почитува Законот за амнестија, а на Јанкуловска ѝ порачува дека Илирида не била ниту Бродец ниту Куманово.

„Законот за амнестија секојдневно се гази преку антиалбански репресалии. Повеќе од 50 отсто од затворениците се Албанци. Колку може во судството да имаат влијание 50 судии Албанци наспроти 612 судии Македонци? И каде беше обвинителството кога Љубчо Георгиевски излезе со предлог за поделба? Зад моето барање стојат повеќе од половина милион автохтони албански гласачи. На Јанкуловска ѝ порачувам дека Илирида не е ниту Бродец, ниту нешто слично како хашките случаи. Апелирам и до пратениците и министрите Албанци да се освестат и да го оправдаат албанскиот глас. Да го подигнат гласот против политиката на албанофобија и да ги поддржат институциите на Илирида“, пишува Халили во соопштението.