Русија им се закани на ЕУ и НАТО

Русија би можела да “употреби сила“ ако НАТО или ЕУ на Косово не дејствуваат во рамките на ООН, рекол денеска рускиот претставник во НАТО, Дмитри Рогозин.

"Ако ЕУ усвои заеднички став или ако НАТО го прекрши мандатот на Косово, тоа нема да биде во рамките на ООН. Тогаш и ние ќе мораме да употребиме брутална сила или, со други зборови, вооружена сила за да бидеме испочитувани“, рекол Рогозин со помош на видео линк Москва - Брисел, објави руската новинска агенција Интерфакс.

Според изјавата на рускиот дипломат, во моментов Косово станало конфликт на идеологии, конфликт меѓу различни ставови кон системот на меѓународната безбедност.

“Кога во Бук*решт ќе се одржи средбата Русија-НАТО, мислам дека рускиот претседател нема да се двоуми да зборува за нашите интереси, за тоа, дека безбедноста треба да биде за сите“, рекол Рогозин.

Според руските власти, земјите кои ја признаа еднострано прогласената независност на Косово, се делумно виновни за синоќешните напади врз нивните дипломатски претставништва во Белград.

“Русија жали поради случувањата во Белград“, рекол портпаролот на руското министерство за надворешни работи, Михаил Камјињин.