Тетово

Те..етово е Теетово.

Ќе видите што значи Теетово.Први мааааај...

Рајските водопади на Беловишка Река

Во сите периоди од годината, студената Беловишка Река е обилна со вода, но во исто време и чиста за пиење

Гојко Ефтоски

ТЕТОВО - Три водопади на Беловишка Река извираат од утробата на Пирибег, претпоследниот врв на долгата Шар Планина во нејзиниот западен дел. Пенливите води ги формираат трите водопади - Горна Цкала, Долна Цкала и Петочко Водиче. Третиот и најнискиот водопад локалното население го нарекува уште и Враживир. Водите стрмоглаво се спуштаат по речиси непроодниот кањон до тетовското село Беловиште. Оваа ретка природна убавина може да се види на простор од два километра, во вкупна должина од 150 метри.

Овие дивини во кои погледот кон небото завршува во испреплетените гранки на огромните дрва, стрмнината по која двата километра до најдалечниот водопад се совладуваат дури со три часа напорен од, љубоморно ги криеле жителите на Беловиште, но и на соседните Вратница, Рогачево, Старо Село и Одри. Планинарите се први кои пред 15 години почнаа да ја освојуваат оваа област и веќе обележаа патека, поставувајќи белези по дрвата од десната страна на Беловишка Река.

Мештаните велат дека целиот тој простор, до врвовите на Шара е богат со дивеч - мечки, лисици, волци, дивокози, срни, но и со вистински ендемични растенија, на кои намерникот наидува напролет, кога природата почнува да се буди. Во сите периоди од годината, студената Беловишка Река е обилна со вода, но во исто време и чиста за пиење, иако ни тврдеа дека најголема е во период кога се топат снеговите на Пирибег и околината. Тогаш и трите водопади, чија должина досега никој не ја измерил, се најдолги и најубави, а кршењето на водата прави вистински спектар на бои. Тие три водопади упатените тврдат дека се втори по должина на Балканот.

Долна и Горна Цкала се доживуваат со поглед оддалеку, дури на 100-ина метри. Петочко Водиче е на дофат на Беловиште, на само еден километар над селото и до него води оформен бехатонски пат. Враживир не е само водопад, каде што по карпестиот дел водата прави скок од 15-ина метри, туку локалитет кој се' повеќе личи на туристичка месност.

Патот води покрај селската црква „Св. Богородица“ и за возила завршува на пристапот, каде што посетителот го пречекува оформен простор со уреден базен, црковна трпезарија. Беловишка Река се преминува преку пешачко железно мовче кое води до две цркви „Св. Петка“ и „Св. Јован Крстител“. Сиот овој дел кој зафаќа простор од околу пет хектари го нарекуваат Петочко Водиче. Овде од корените на дрвјата излегуваат многу извори, но еден е не толку голем и насочен кон црквата „Св. Петка“, а велат дека бил лековит, особено за очи. Со децении доаѓале луѓе од многу места што имале проблеми со видот, а жители на Беловиште ќе речат дека „многумина се излекувале“. За овој извор се поврзува и градбата на црквичето.

Иселеникот од Беловиште Сашо Јаковчевски сонил дека треба да изгради црковен храм во кој ќе ја насочи водата. Заедно со неговиот татко Живко, беловиштани од Детроит на 15 мај 1977 година ја изградиле црквата, ја насочиле водата, а на спомен-плочата не заборавиле да напишат: „Оваа чешма е лековита за очи“. Во Беловиште тврдат дека водата е света, дека тие што ја пијат се поздрави, па затоа по патеката од селото до чешмичето во црквата, независно од периодот во годината, па и денот, ќе сретнете минувачи со шишиња да наполнат вода. „Овде најмногу се доаѓа на Велипеток, пред Ѓурѓовден, пред изгрејсонце. Тогаш водата е најлековита и вистински - света“, ни рекоа две жени кои се движеа да наполнат вода.

Овој пат и нашето патување заврши кај Петочко Водиче. Овде ни се виде вистински рај, па и во ова време од годината, иако беловиштани велат дека е најпосакувана пролетта. „Убавините, питомоста, чистиот воздух и вода, во пролет најдобро се доживуваат", зборува Васко Матовски.

Токму поради природната реткост, на само 50-ина метри од малата црквичка се наоѓа уште една, посветена на св. Јован Крстител. Кога сите би биле во Беловиште, ова би била населба од над 2.000 жители, но, сепак, опстојува со 70-ина куќи и околу 300 жители. Мештаните велат дека Беловиште ќе опстојува за вечни времиња.