Дали треба да се јаде месо или не?

 

Професорот Марк Пост доби 300.000 евра за да направи еден хамбургер. Многумина веднаш си помислија дека за тие пари, ќе направат еден куп хамбургери, но задачата која ја има професорт бара од него да не користи месо од ниедно животно, а да има месо во хамбургерот!

Професорот Пост е еден од малкуте луѓе кои можат тоа да го направат. Како шеф на Одделот за Васкуларна физиологија при универзитетот во Мастрихт, Холандија, тој е еден од научниците кои ќе се обидат да создадат месо и со тоа да го намалат убивањето на животните.

Наместо кланиците кои ги одгледуваат животните само поради месото, професорот Пост ќе се обиде да создаде месо во лабораторија со помош на матични клетки од мускули. Тој тоа го објаснува како процес на промена на одгледувањето животни на фармите и одгледување на месо по фабриките. Матичните клетки се посебен вид на клетки кои можат самите да се разможуваат.

Според наводите на ОН, потребите за месо ќе се дуплираат до 2050 година. Во истиот извештај се наведува и тоа дека животните кои се одгледуваат за потребите на производството на месо консумираат 10% од питката вода во светот.

Исто така, голем број на вегетаријански организации укажуваат на потребата од заштита на животните и на фактот дека начинот на кој произведуваме месо не е одржлив процес поради трошоците кои го следат овој начин на производство.

Оваа идеја не е баш нова, во средината на 20 век, Холанѓанецот Вилем ван Еелен, студент на медицина, имал слични идеи кои никогаш не ги реализирал. Исто така, и НАСА била заинтересирана на овој начин да ги храни своите астронаути, но се откажа од идејата.