ИЗБОРНИ ИНЦИДЕНТИ И ПРЕДИЗБОРНИ ДУБАРИ

Четири години затвор за спречување избори и гласање, ова е пресудата на Тетовскиот суд против Сељам Терзија (36).Терзија предводел група од 10 лица, која упаднала на гласачкото место 1930. Тој околу 17 часот влегол во училницата и им рекол на членовите на избирачкиот одбор „Седете мирни, ние знаеме сега што треба да се работи“. Зеле гласачки ливчиња, ги пополниле, заокружиле имиња во гласачкиот список и ги уфрлиле ливчињата во кутијата. Ја присилиле избирачката комисија да го потпише записникот и сами го однеле гласачкиот материјал во општинската изборна комисија.

Ако им се исплаќа 4 години да чмаат во ќумез, нека прават инциденти пак...

Претседателскиот кандидат и професор Ѓорге Иванов ја злоупотребил функцијата и постапил неетички ако ги советувал студентите да се потпишат за кандидатурата на Нано Ружин, оценија вчера професорите и студентите. Неговата изјава дека со студентите му помогнал на Ружин да се кандидира ја шокира универзитетската и македонската јавност и повторно ја доведе во прашање автономноста на универзитетите, откако ректорите на трите државни универзитети ја поддржаа кандидатурата на Иванов за претседател. Од ВМРО-ДПМНЕ вчера не сакаа да ја коментираат изјавата на нивниот претседателски кандидат Иванов, ниту дали имало некакви политички пазарења со ЛДП

АГИТАЦИЈАТА Е НЕДОЗВОЛИВА

Деканот на Правниот факултет, Борче Давитковски, најави дека ќе го повика професор Иванов на разговор и дека ќе побара детаљно да се запознае со случајот. Тој нагласи дека е недозволиво да се агитира кај студентите за политички цели.

- Деновиве ќе го повикам Иванов на разговор, прецизно да се информирам за тоа што се случувало. Мислам дека не се работи за злоупотреба во смисла тој да агитира или да убедува студенти да се мешаат во претседателските кандидатури, туку за изјава дадена во еуфорија. Инаку, согласно со правилата на Универзитетот, недозволиво е да се агитира или да се влијае на студентите во политички контекст. Универзитетот треба да биде целосно самостоен, надвор од политиката. Значи, не смее да се меша политиката со студентите - изјави Давитковски. Претседателот на Сојузот на студентите, Самоил Манчевски, вчера не сакаше да ја коментира изјавата на Иванов, правдајќи се дека не сака да се меша во политички работи. Коментар избегна да даде и Иван Живковски, претседател на Студентскиот сојуз на Правниот факултет на кој Иванов е професор. Тој објасни дека има став, но не сака да го каже бидејќи на тоа веднаш ќе му се даде партиска боја.

- Целосно го осудуваме однесувањето на професор Иванов. Тој со својата „молба“ ги ставил студентите во подредена позиција и им дал нечесна понуда. Тие всушност треба да одлучат меѓу политичкиот избор што им го наметнува тој и стравот ако не послушаат дали ќе го положат испитот кај него. Страшно е тоа што студентите немаат каде да се пожалат за ваквото однесување, нема никаков механизам за нивна заштита - изјави Александар Стојановски од Младинскиот образовен форум. Тој го искритикува и молчењето на студентските лидери бидејќи, според него, тие треба први да се спротивстават и да ги заштитат студентите.

НАЈТЕМНА ДАМКА НА ИЗБОРИТЕ

Кандидатот на ЛДП, Нано Ружин, вчера демантира дека имало некаков политички пазар и изјави дека потписите за неговата кандидатура се собрани на чесен начин и дека тоа може да го провери Државната изборна комисија. Според него, Иванов веќе не може да се контролира поради притисокот што го има, бидејќи на ВМРО-ДПМНЕ му паѓа рејтингот. Ружин оцени дека оваа изјава на Иванов фрла најголема дамка на изборниот процес.

- Јас сум изненаден од неговата изјава дека професорите се во состојба да влијаат врз студентите и нивната политичка слобода за кого да се изјаснат. Ако има таква моќ, логично е тие својот потпис да го дале за неговата кандидатура. Сепак, јас сум ставен во непријатна положба. Очигледно Иванов излезе од контрола, поради рејтингот е под постојан притисок на неговиот штаб и Владата. Јас сум фрапиран, не го препознав оној Џоле што го знам од пред десет години - изјави Ружин. Директорот на Граѓанската асоцијација „Мост“, Дарко Алексов, рече дека треба да се провери дали изјавата на Иванов е точна, за да се процени дали станува збор за нарушување на изборните правила. Професорката и кандидатка од ДПА, Мируше Хоџа, рече дека треба да се провери дали изјавата на Иванов е точна. Таа е децидна дека не е етички еден професор да им ги наметнува своите политички ставови на студентите.

- Малку ми е нелогично зошто тој се заложил кај студентите за Ружин, а не за себе - изјави Хоџа. Шефот на Изборниот штаб на СДСМ, Игор Ивановски, оцени дека е обелоденет обидот на Груевски за предизборна измама на македонските граѓани. Тој побара ректорот на Универзитетот „Св. Кирил и Методиј“ да застане во одбрана на автономијата на Универзитетот, а претседателот на Сојузот на студентите да ги заштити студентите од заканите и притисоците на Ѓорге Иванов.

- Нано Ружин е како тројански коњ уфрлен од Груевски во опозицијата. После вчера јасно е дека Ружин е кандидат на Груевски и ВМРО-ДПМНЕ. Ваквиот обид за доведување на граѓаните во заблуда е кривично дело и истовремено претставува сериозно нарушување на изборните правила и целосно уништување на демократијата во земјата. Иванов јавно призна дека извршил вандалско кршење на автономијата на универзитетот, ја злоупотребил својата професорска функција за манипулација со студентите - изјави Игор Ивановски. Тој додаде дека Иванов треба да им се извини на студентите за сите, како што кажа, изречени клетви, навреди и направени притисоци и закани. СДСМ најави дека за овој случај ќе поднесе претставка до ДИК и ќе ги информираат ОБСЕ и ОДИХР.

Татјана Поповска, Анета Тодевска
Фото Слободан Ѓуриќ- Дневник

СДСМ со проект 20x5 до повеќе гласачи