За последниве шест години македонските граѓани на избори излегоа дури пет пати. Ако случајно партиите пак решат дека последнава криза во владината коалиција може да се реши само со избори, во ноември ќе ни биде шести пат, или трети предвремени парламентарни избори. А в година имаме и редовни локални избори.

Во 2006 беа редовните парламентарни избори, по самитот на НАТО во Букурешт во 2008 ги имавме првите предвремени парламентарни избори, 2009 редовно гласавме за нов шеф на државата и за нова локална власт, лани втори предвремени парламентарни избори, а за годинава можни се, пак, предвремени парламентарни избори. А во март в година ни стигаат редовните локални избори. Шест избори за шест години, или во најдобар случај шест гласања за седум години.

А пред секои избори сите се согласуваат со оцената дека во тој период, како по некое непишано правило, сите економски активности некако природно замираат. Сите почнати реформни зафати застануваат. Тендерските постапки запираат. Инвестицискиот процес забавува. Сите се во очекување на новите изборни резултати. И самиот податок за вака чести изборни соочувања во која било земја значи и извесна политичка нестабилност.

За тоа како предвремените избори можат да влијаат не економијата, еве што изјави лани Зоран Ставревски, министерот за финансии.

„Треба да се знае кој ќе ја формира економската политика и тоа е она што е најзначајно за економските субјекти. Што побрзо се излезе на избори и што побрзо се завршат изборите е подобро за економијата, за приватниот сектор, за бизнисмените и за реформите во Република Македонија“.

Тоа е едната страна. Што е со прашањето колку чинат едни избори? Според информациите од Државната изборна комисија, организирањето едни избори државата ја чини околу 4 милиони евра.

Ако на ова се додаде и повратот на средствата од буџетот на сметка на партиите што влегле во парламентот за освоен глас (3 евра за еден глас), таа бројка се зголемува за уште два милиони евра.

А за тоа колку трошат партиите за кампањите, е тоа е веќе сосема друга приказна, а и бројките се најмалку дупло поголеми.