Дајте една лоша вест

Новата генерација деца ќе живеат пократко од своите родители поради дебелината и здравствените проблеми што се јавуваат од прекумерната тежина. Лекарите алармираат дека итно мора да се преземат превентивни мерки за да се спречи дебелеењето, особено кај малите деца, бидејќи последиците по здравјето во понатамошниот тек од животот и трошоците за нивно санирање ќе бидат огромни.

Кардиоваскуларни болести, дијабет тип 2, зголемени количини на масти и шеќер во крвта, мозочни удари, нарушување на работата на репродуктивните органи, се само дел од заболувањата со кои ќе се соочат децата со прекумерна тежина.

Родителите најчесто не обрнуваат внимание на предупредувањата од лекарите дека нивното дете има вишок килограми, сe додека сериозно не му се наруши здравјето. Таков пример имаше пред неколку недели, кога медиумите објавија дека шестгодишно дете од внатрешноста на земјата завршило во болница. Неговите родители избезумени не можеле да поверуваат дека килограмите се причината за здравствените проблеми.

"Три дена сме во болница, а лекарите велат дека не требало да дозволиме да јаде толку често и да јаде масна храна. Што можам јас да правам кога бара храна. Неколкупати се обидов да го спречам, но видов дека нема ефект и го оставив да јаде. Се плашам за неговото здравје, а лекарите велат дека мора итно да се стави на диета", рече тогаш мајката на болното дете.