Дали ги памтите настовниците кои биле добри?

Учителката им дава и знаење и насмевки на болните деца

Андријана Митреска секој ден им држи настава на децата што се хоспитализирани на Детската клиника во Скопје

„Учителке, дајте ми боенка“, вака едно петгодишно девојче секој ден ја пречекува единствената наставничка што работи на Детската клиника во Скопје. Андријана Митреска секој ден од 10 до 14 часот одржува настава во болничките соби на детските одделенија. Иако има задача да работи само со ученици до четврто одделение, таа со задоволство наоѓа време да бои и да им раскажува приказни на две-три годишни деца, но и да ги подучува поголемите за задачите по математика, за пишување, за лектири...

При нашата посета на Детската клиника, учителката ја затекнавме на одделението за хемато-онкологија, додека на едно од децата му објаснуваше лекција по математика.Нејзината непосредност лесно ја пробива бариерата наставник - ученик и сериозната математичка задача децата ја решаваа низ игра.

- Ги учам да читаат и да пишуваат оние што не знаат, но најчесто им задавам логични задачи за да можат логично да размислуваат. Конечно пристигнаа и книгите, што ми ги додели Општина Центар за да можам да работам со учениците, па сега можам да ја предавам програмата што ми е зададена - вели Митреска.Таа вели дека никој ниту од Министерството ниту од Општината не и' најавил дека конечно ќе ја вработат. Учителката вели дека е изненадена, иако долго го очекувала решението. Родителите чии деца се лекуваат на Клиниката велат дека се презадоволни од учителката и дека нивните деца со нетрпение ги очекуваат часовите.

-Убаво е што има наставник во болницата. Иако моето дете е мало и не знае да чита и да пишува, со оглед дека минува многу време во болница, учителката е вистинско чудо за неа. Таа насмеана ја чека секој ден за да бојат во боенка. Така моето дете ги учи боите, но и да слуша наставник со оглед дека не може да оди во градинка - вели Трајанка Илиоска. Во Министерството за образование велат дека Клиниката се обврзала секои три месеци да доставува известување за тоа колку деца ги исполнуваат условите за да следат настава.

- Штом учителката ќе добие решение за вработување, наставата што ќе ја следат децата ќе биде призната исто како да посетувале настава во основно училиште. Ќе направиме се' наставата во болницата да се развива - велат во Министерството.Вида Крстеска, инспектор за основно образование во Општина Центар, вели дека воопшто не е спорно вработувањето на учителката, но мора да причекаат да завршат изборите, бидејќи од Заводот за вработување не прифаќаат такви решенија во предизборието.

- Штом учителката добие решение за работа, ќе и' обезбедиме дневник за комбинирани паралелки, во кои ќе ги внесува податоците и резултатите на децата во болница. Ако има потреба ученикот да остане доволно долго во болница, на крајот од учебната годинана тие ќе добијат веродостојно свидетелство. Веќе и' е доставена програма за комбинирани паралелки. Сите трошоци што досега не и' се исплатени, Министерството ќе ги исплати дел по дел, како хонорарни часови - вели Крстеска. Директорот на Детската клиника, Ацо Костовски, вели дека ја поддржува работата на учителката и дека и' стои на располагање доколку и' треба помош полесно да се снајде во оваа училишна година.