„Пивофест“: Парада на скапотијата, лошиот вкус и општинскиот башибозук

од Зоран Милошески, НОВА | објавено на: 27-07-2014 15:59:36

Мислење: Зоран Милошески, дописник на НОВА од Прилеп

Ова е „телеграфскиот“ извештај за последното издание на „Пивофест“. Повеќе од очигледно е дека последниве години, што се однесува и до посетеноста, а уште повеќе до заложбите за негово дефинирање како „културен“ настан, манифестацијата има надолен тренд. 

Дефинитивно паднаа во вода двете долгогодишни манипулации. Првата, дека „Пивофест“ е најголем фестивал на Балканот, од причина што споредбата со „Егзит“ и „Гуча“ изгледа непристојна. Втората, дека настапите на Цеца, Брена, Здравко, ги следеле повеќе од 100.000 посетители, затоа што и физички, и математички, просторот на кој се одржува „Пивофест“ ниту приближно не може да собере толку народ. 

И кај домаќините и кај гостите, видливо беше незадоволство од високите цени на пивото и особено скарата, од причина што во споредба со другите „нефестивалски“ денови тие беа повисоки за 50-70%. Жителите, пак, на централното градско подрачје, имаа проблеми од поинаков карактер. 

Прилеп под блокада на редарските служби

Еднонеделното затворање на главната сообраќајна артерија на градот, булеварот „Маршал Тито“, го оневозможува нормалното функционирање и движење на граѓаните. Какофонијата од забавна, техно, народна, турбо-фолк и плех музика која до раните утрински часови истовремено доаѓа од главната бина и триесетината штандови, остава без сон илјадници граѓани на кои „Пивофест“ не им е приоритет во животот. Сето ова ја налага потребата за негова дислокација од центарот на градот, како што впрочем е тоа случај со сите вакви или слични манифестации во светот. 

Сепак, најголема дамка на „Пивофест“ фрли несоодветната примена, или поточно кажано, злоупотребата на одлуката на Советот на Општина Прилеп за наплата на паркинг во висина од 100 денари. Наместо тоа, редарските служби ги блокираа сите влезови во градот, така што такса од 100 денари мораа да платат и оние кои одеа на гости кај свои роднини или пријатели, како и тие кои само поминуваа низ градот и патуваа во населените места од соседните општини. 

Да биде трагикомедијата уште поголема, пари им се бараа дури и на граѓаните на Прилеп кои после завршените земјоделски работи се враќаа дома. За среќа, „блиските средби“ со редарите поминаа без посериозни инциденти и се сведоа на вербални расправии и кавги. Но и покрај тоа, останува обврската на организаторот јавно да го соопшти името на лицето кое ја злоупотреби одлуката на советниците и го предизвика овој скандал. 

„Пивофест“ знаел и за подобра музичка понуда

Што се однесува до музичкиот дел на годинешниот „Пивофест“, не треба да се биде музички критичар за да се констатира дека љубителите на пивото видоа два одлични, повеќе просечни и неколку лоши настапи. 

Извонредниот музички и визуелен перформанс на DJ Nastia Zoloto & First Entertainment, беше најдоброто што годинава можеше да се види на „Пивофест“. Штета што настапот на атрактивната и креативна украинска диџејка и прекрасните танчерки го проследија не повеќе од 2.000 луѓе. Рамо до рамо со неа беше и хрватскиот панк-рок бенд „Хладно пиво“, чиј моќен и професионален настап публиката го препозна и го прифати. 

За разлика од нив, „титулата“ за најлош музички настап ја заслужи Емина Јаховиќ-Сандал. Ниту публиката ги знаеше нејзините песни, ниту таа ја убеди публиката дека знае да пее, така што неподелено беше мислењето на присутните дека, освен добрата желба и жешките пантолончиња, за комплетен позитивен впечаток беше потребно многу повеќе од понуденото. 

Иако организаторите велат дека изборот на гостите за музичкиот дел од „Пивофест“ беше направен преку гласање на посетителите на официјалната веб страна на фестивалот, тешко е да се поверува во такво нешто. Прелистувајќи го „минатиот труд“ на гостите, ретко кој верува дека „Joke“, „The toasters“, Маид Хечимовиќ, па дури и Жељко Самарџиќ, беа доведени како резултат на спроведената анкета. 

За да нѐ убедат во тоа, организаторите ќе треба да приложат соодветни аргументи, како што е, на пример, листингот со телефонски јавувања врз основа на која е направена селекцијата. Во спротивно, чаршијата уште долго ќе ја врти приказната дека добар дел од пејачите биле личен избор на поединци од локалната власт, или на луѓе од нивното потесно опкружување. 

Општински административци „интервјуираат“ странски музичари

Причина повеќе за таквиот сомнеж даваат и официјалните документи за службени патувања на вработени во прилепската локална самоуправа, до кои дојде НОВА. Имено, во документацијата постојат одлуки за службен пат во Србија, како и потврди за исплатени дневници на лица вработени во Општина Прилеп, заради правење интервју со српски музичари!? И сето тоа непосредно пред „Пивофест 2013“. 

Бидејќи изгледа прилично нелогично вработени во општинската администрација да одат на службени патувања со цел да интервјуираат странски музичари, за ваквите постапки побаравме објаснување од локалната самоуправа. А тие, пак, се пофалија дека од тој пристап на општината „ефектите веќе биле видени“. 


Од причина што во моментов не е предмет не нашиот интерес, нема да навлегуваме во дебата за начинот на кој општинските административци ги извршуваат своите работни обврски, ниту пак ќе спориме за големиот број на (не)успешно организирани манифестации. На таа тема, другпат. 

Но, кога се работи за носење познати музички имиња од странство на музички манифестации во Прилеп или во други општини, тешко ќе убедите некого дека договорите со нив ги склучуваат локални административци, а не познати менаџерски куќи. Исто како што е фикција самата помисла дека можноста да го видат Горан Бреговиќ во Прилеп, како и висината на неговиот хонорар, зависат од „интервјуто“ кое со него ќе го направи некојси општински секретар или раководител на сектор? Впрочем, настапите на добар дел од учесниците на манифестации и „тезги“ во други градови низ државата непосредно пред или после „Пивофест“, кажува сѐ. 

Што се случувало пред годинешниот „Пивофест“, дали се повторила минатогодишната пракса на правење интервјуа со некој од музичките ѕвезди кои настапија во четирите фестивалски вечери, веројатно ќе дознаеме следната година. Дотогаш организаторите имаат сосема доволно време да ги согледаат и исправат пропустите кои ги посочивме. Малку повеќе самокритичност, никогаш никому ништо лошо не донесла. 

А за останатите детали кои ги содржат документите за службените патувања на вработените во прилепската локална самоуправа, ќе читате наскоро на НОВА.