Зошто светот ја мрази Гвинет Палтроу?

Гвинет Палтроу е прекрасна и талентирана. Висока, русокоса, со тело кое може да и позавидат и најпознатите манекенки. Ќерка на славен режисер (покојниот Брус Палтроу) и успешна холивудска актерка, Блајт Данер. Освои Оскар на возраст од само 26 години, за нејзината улога во Shakespeare In Love, а пред да се омажи за пејачот Крис Мартин беше во врска со најзгодните и најуспешните актери на денешницата како Бред Пит и Бен Афлек. Но, минатата недела Оскаровката објави дека ќе стави крај на 10-годишниот брак со Мартин и дека разводот е неизбежен за двајцата. 

Нема негирање дека веќе подолго време постои „омраза кон Гвинет Палтроу“, а минатата година се најде на врвот на листата на најомразени славни личности од Star магазинот.  Но, најголем дел од омразата кон Гвинет не доаѓа од нејзината филмска кариера, туку од нејзиниот  имиџ во генералната популација, поттикнат од холивудски елитизам кој често јавно го искажува и одбивањето да се доближи барем малку до „обичниот човек“. Голем дел дури и од нејзините фанови ја сметаат за арогантен сноб која се држи до  високата класа во која припаѓа и од високо гледа кон луѓето од кои и зависи нејзиниот имиџ. Публиката. Изјавите како „попрво ќе умрам отколку да им дадам на моите деца супа од конзерва“ и „Не можам да се преправам дека заработувам 25.000 долари годишно“ само го зголемија незадоволството кон Гвинет. Омразата кон Гвинет ја зголеми и нејзиниот кулинарен сајт GOOP кој на почетокот требаше да нуди рецепти, производи и совети за зафатените мајки како неа, но всушност се што понуди се рецепти и производи кои се екстремно скапи и кои ниту најголемиот дел од жителите на планетава не можат да си ги дозволат. На GOOP може да се најдат органски гурмански рецепти со вредност од дури 200 долари на дневна база. Дури и за побогатите семејства во САД тоа се премногу пари да да ги потрошат во еден ден, па дури и за храна. Таа во изминатите години ги зачуди сите со изјавите дека не им дозволува на нејзините деца да гледаат телевизија на англиски јазик, а да не споменуваме дека си ги крсти децата Apple (јаболко) и Moses (Мојсеј). 

Гвинет минатата година дури лансираше и своја анти Vaniy Fair кампања. Кога респектираното списание објави дека планира да напише статија за нејзиниот живот и кариера, со вообичаените пикантерии, Гвинет не се двоумеше да го пушти својот тим на работа. Статијата воопшто не и се допадна на Оскаровката, па по кавгата со уредникот на списанието, им забрани на сите „славни“ пријатели да писнат за неа и се обиде со целиот свој ПР тим да го спречи објавувањето. Според Daily Mail таа издејствувала да добие „поблага“ верзија на оригиналната статија, што е само „добивање на битката, но не и на војната“.  Но, искрено публиката сака да  дознае за неа каква е таа всушност зад камерите. Кога беше објавена веста за разводот, коментарите од читателите на медиумите кои известуваа беа полни со поддршка кон актерката, но во нив можеше да се прочитаат и повеќе од тие што ја познаваат. Не, од славните колеги во Холивуд, туку од обичниот народ кој во било која прилика соработувал со неа. Еден од коментарите на Yahoo News беше од статистка на еден од нејзините филмови и таа (иако остана анонимна) објасни дека Гвинет е ужасна кон сите околу неа. Таа наводно обожавала да ги понижува и навредува тие под неа и дека е непрофесионална и нереспектабилна за соработка. 

Таквиот имиџ се рефлектираше и во нејзината професионална кариера, бидејќи по одличниот The Royal Tennenbaums и солидниот Sylvia од почетокот на новиот милениум таа не успеа да ја поврати кариерата која ја имаше во 90-те. Кога освои Оскар, кога жонглираше со успешни и финансиски исплатливи филмови како Talented MR. Ripley и Seven, но и со одлични нискобуџетни проекти како Hard Eight и Emma. 

А кога во 2011-та година на конгресменката Габи Гифордс и беше извршен обид за атентат, таа истрча да изрази сочувство, но и да објави дека иако никогаш не се сретнале, двете се всушност втори братучеди. Дел од американската јавност ја обвини актерката дека се обидува да добие промена во нејзиниот имиџ преку емпатија од тој ужасен момент па затоа се решила да го објави сродството. Со други зборови да добие дел од симпатиите наменети за вистинската жртва. Гифордс. 

Веќе подолго време е сосема прифатливо во Холивуд (и надвор од него) да се презира Гвинет Палтроу, но веќе подолго време има и  причини за тоа. И тие се многу повеќе од љубомората за нејзиниот беспрекорен изглед. Но, додека го очекуваме следниот проект на Оскаровката, да се потсетиме на дел од филмовите кои ја направија респектавбилна актерка.