Во Србија, особено во Поморавскиот регион владее вистинско лудило по мобилниот телефон Нокиа, модел 1100 од 2003 година. Со помош на овој телефон, произведен исклучиво во германскиот град Бохум, може да се хакираат, да се пресретнуваат банкарски трансакции и да се вадат пари од банкомат.

Цената на овој модел пред седум години, кога се појави на пазарот беше неколку стотици евра. Но денес откако веќе не се произведува достигнува и до пет илјади евра.

Еден од трговците, кој веќе продал десетина модели, за српскиот весник "Прес“ја објаснил целата постапка за вадење на парите. Тој раскажал дека наводно постои грешка во софтверот, односно има место во меморијата на телефонот и таму се додава дел од софтвер кој може да влегува во туѓите трансакции. Кога ќе се прочитаат бројките на банкарската сметка и пин-кодовите, тогаш се преминува на реализација. Банкарската картичка со чип, која е поврзана со кабел за мобилниот телефон, се става во банкомат, потоа се испишуваат бројот на сметката и ПИН-кодот и се вадат парите.

Заинтересирани клиенти, според Прес имало не само од Србија, туку и од Косово и Македонија.