Густите, непровидни завеси просторот ќе го направат потемен, но нивна предност е што овозможуваат одлична топлинска изолација. Поради своите карактеристики нивната примена е пожелна во спалните соби, каде добро ќе ги заменат ролетните и да ја сочуваат интимата на просторот од љубопитните погледи од надвор. Поради ефектот на затемнување, полесно може да се одмориме и да спиеме во текот на денот, да кажеме после одработена ноќна смена.

Тешките завеси згодно е да се применат и во големите простории, односно на големите ѕидни и застаклени површини како втори завеси, односно во комбинации со тенките, проѕирни завеси. Тие се превлекуваат преку тенките завеси кога во просторот сакаме да направиме поинтимна атмосфера, или пак во студените зимски вечери, како би се задржала топлината во просторот и би се заштедило на трошоците за загревање. Повлечените густи завеси во комбинација со тенките имаат и дополнителен декоративен удел, посебно ако се со декоративна лента или украсни копчиња.

Завеси во кујните

Ако завесите можат да се перат во машина или ако не се многу подложни на валкање, одржувањето ќе биде олеснето. Овие завеси се погодни во кујна каде што се изложени на маснотии и пареи од готвење, па е потребно нивно почесто чистење. Завесите истотака треба да може да се перат во топла вода, а пожелно е и да се проѕирни за да пропуштат доволно дневно светло во кујната и така на домаќинката или на домаќинот да им ја олеснат работата во кујната.

Ткаенините во кои се присутни повеќе од 50% синтетички материјали, како и ткаенините од памук се подложни на собирање од перење, па затоа на ова треба да се размислува при купувањето, особено ако се скроени според димензиите на просторот. Добро е завесите од вакви материјали да се кројат после првото перење.

Истотака, добро е да се знае дека корнизата, исто како и завесата би требало да биде барем 20 cm подолга од ширината на просторот која би го покрила, за да убаво стои и да овозможи идеална топлинска заштита на просторот.

Поставување на завесите

Некогаш многу вообичаените корнизи, со пластична или дрвена предна маска и водилки од пластика или метал по кои лизгаат пластичните водилки закачени за завесата, се заменети во корнизи во облик на шипка со лизгачки прстени. Изведбата е во различни варијанти, од дрвени, пластични до метални, во различни бои. Краевите на шипките се украсени со декоративни материјали во топчест облик спирални тродимензионални облици, листови итн.

Со примена на телескопска шипка загарантирана е поголема флексибилност, односно можност за развлекување на корнизот на саканата должина. Такви се и малите прозорски корнизи на кои може да се навлече завеса преку целиот или половина прозорец, а се прицврстуваат со помош на мали куки на внатрешната рамка на прозорецот. Овие завеси претежно се поставуваат во кујните или во долгите застаклени површини на ходникот или верандата.

Кај балконските врати интересна е изведбата со корнизи кои се преклопуваат, како и корнизи со повеќе канали (два, три или четири).

Интересни се и новите решенија за поставување на завеси со помош на ленти со чички. Овој вид на поставка наречена е “Break-A Way систем ”, а нејзината примена е препорачлива во детските градинки, во бањите, каде ако случајно завесата се зафати, би можело да дојде до повреда или пад на корнизата и целиот систем што ја држи завесата.

Духот на старината на прозорците

Штиркањето, хеклањето, кукичењето се стари техники на ткаење кои биле практикувани во вечерните часови, кога уште немало телевизија. Штета е да се изгуби смислата и традицијата, па размислете како би било со ракотворби да ги украсите своите прозорци!

Дрвото е градежен материјал кој повторно се враќа во мода. На прозорците од дрвена куќа, како и во новоградбите кај прозорци од монтажни куќи украсени со цвеќе, убаво ќе се вклопат завесите од ленен материјал чии рабови се опшиени со чипка.