Тројца Британци-евангелисти се изведени на суд во Тирана, под обвинение дека во дом за сирачиња, кој го отвориле во 2001 година со помош на црквите во Албанија и од Британија, во албанскиот главен град вршеле сексуално заведување и обесчестување малолетни машки и женски деца, пренесува МИА. Дејвид Браун, кој бил раководител на домот, и неговите соработници Дино Христодулу и Робин Арнолд, социјален терапевт, прибирале во домот деца директно од улиците нудејќи им заштита, дом, храна и нешто пари. Лондонски „Гардијан“ пишува дека набргу по отворањето на домот почнало да се зборува за „чудните работи што се случуваат таму“, а албанските социјални работници барале полицијата да ги провери тврдењата на некои од малолетниците кои ги обвинувале луѓето од домот дека „ги заведувале сексуално“ и дека Браун и другите двајца ги прибирале ноќе во своите кревети. Дури десет момчиња на возраст меѓу четири и 13 години им раскажале на полицајците дека биле сексуално обесчестени од еден или од сите британски мисионери, по што полицијата ги обвинила за хомосексуални врски со малолетници. Браун е уапсен во Албанија, а Христодулу и Арнолд биле екстрадирани од Британија во мај годинава. Според „Гардијан“, Браун, кој е хуманитарен работник од Единбург, дошол во Албанија во 2000 година како доброволец за да им помага на бегалците кои во тоа време бегале од Косово и веднаш почнал со нудење заштита на малолетни Роми кои ги наоѓал како просат по улиците. Весникот нагласува дека албанската јавност е вчудовидена од откритието на полицијата и шокирана од сведочењето на четири од децата, кои на судот зборувале преку видеолинк. - Како и да се развиваат работите понатаму, случајот ќе остави длабоки последици врз механизмот на детската заштита меѓу Британија и другите земји во светот - забележува „Гардијан“. Во изјава за весникот, тројцата Британци признаваат дека имало случаи на заведување на децата, но меѓусебно се обвинуваат за тоа кој ги правел. Ако судот ги прогласи за виновни, може да бидат осудени на затворски казни и до 20 години.