Торонто, 20 септември (МИА) - Канада го призна уставното име на Република Македонија, соопшти Обединетата македонска дијаспора (ОМД). Одлуката, како што наведува ОМД, се очекува и официјално да биде  соопштена од канадските власти.

- Оваа одлука за Македонија е од големо значење, со оглед на фактот што Канада е членка на  Г8 - групата најразвиени земји во светот и влијателна членка во НАТО. Тоа претставува и значаен момент за сите канадски Македонци, кои со нивната посветеност, постојаност и неограничени напори придонесоа за оваа позитивна измена во канадската надворешна политика. Македонците почнаа да емигрираат во Канада пред повеќе од 100 години и помогнаа во градењето на канадското општество во сите форми на животот, социјалниот, економскиот и политичкиот. Денес, околу 200 илјади Македонци живеат во Канада. Македонија и Канада заедно работат на обновувањето на Авганистан и оваа земја е силен поддржувач на НАТО аспирациите на Македонија, укажува ОМД.

Македонија досега има воспоставено дипломатски односи со 158 држави во светот, а под уставното име е признаена од 117 меѓу кои и три од постојаните членки на Советот за безбедност на ОН - САД, Русија и Кина.