Емил Зафировски

Здруженијата на семејствата на Македонците и на Албанците чии членови настрадаа во воениот конфликт во 2001 година почнале преговори за заедничко дејствување пред институциите за нивно обесштетување и згрижување. Иницијативата ја поднело здружението на ранети и членови на семејствата на загинати припадници на вооружените сили на Македонија „Херои на Македонија - жртви на албанскиот тероризам“. Здружението на Македонците испратило писмо до здружението на Албанците, чиј претседател е Фазли Велиу, во кое бара заедничко дејствување пред институциите за задоволување на правата на оштетените семејства од конфликтот од 2001 година. Дознаваме дека писмото било доставено директно во седиштето на ДУИ, од каде што веднаш било позитивно одговорено. Надица Мирчевска, претседателка на здружението на семејствата на македонските бранители, вчера ги потврди информации. - Јас го загубив сопругот во тој конфликт. Крвта е пролеана, а болката е огромна. Но, време е да си подадеме рака оти истата болка ја доживеаја и семејствата на Албанците што загинаа во 2001 година. Време е заеднички да дејствуваме пред државата и да си ги оствариме правата што не ни ги даваат. Ако некој од државниците смета дека семејства на загинатите бранители немаат право на бенефиции и помош од државата, нека излезе и јавно нека го каже тоа пред целиот народ - вели Мирчевска. Информациите ги потврди и Фазли Велиу, претседател на здружението на семејствата на Албанците и на воени ветерани од поранешната ОНА- Во суштина ги имаме истите проблеми. Не можеме пред институциите да обезбедиме статус за настраданите и за нивните семејства. Ние бараме институционално да се реши статусот на поранешните борци на ОНА, вработување, државата да обезбеди материјална отштета за семејствата на ранетите и на загинатите, а на инвалидите да им се дадат пензии - вели Велиу. Велиу нагласува дека е подготвен за соработка со здружението на Македонците. - Ние веќе стапивме во контакт и разменивме некои искуства. Но, без политичка поддршка нема да успееме. Владата мора да покаже волја и да го реши проблемот. Досега добивавме само празни ветувања. Во спротивно, ние, Албанците, ќе обезбедиме вонинституционални фондови за помош на воените ветерани и за семејствата на настраданите. Фондовите ќе ги обезбедиме преку доброволни прилози на Албанците од Македонија и од странство со нивно издвојување 7 отсто од нивните месечни плати. Но, доколку решението не биде институционално, одговорност ќе сноси државата - вели Велиу. Во писмото испратено до седиштето на ДУИ се наведува дека државата мора да ги реализира барањата на жртвите од воениот конфликт. - Законот што беше донесен во 2002 година претставува само убаво парче хартија, кое за нас нема никаква практична вредност. Тоа парче хартија им овозможи на разни криминалци да ги наполнат џебовите и политички да профитираат. Затоа од вас бараме соработка и заедничка стратегија за дејствување. Заеднички да им оддадеме почит на загинатите во конфликтот од двете страни без да коментираме кој бил во право, а кој не - пишува во писмото на здружението на ранети и членови на семејства на загинати припадници на македонските безбедносни сили.