Лубеницата уште во старите времиња се употребувала како намирница која го штити телото од преголемо губење на течности. Поради големото ниво на вода таа дава чувство на ситост, но содржи малку калории, само 29 на 100г. Освен вода содржи и витамин А, Ц, бетакаротен, ликопен, железо, цинк, калиум... Поради големата количина вода тие често се употребуваат за детоксификациски процес на организмот, бидејќи го чисти телото од штетни состојки кои се лачат преку урината, што придонесува за чистење на бубрезите. Лубеницата содржи минерали и витамини, овошна киселина и бои кои и даваат освежувачки вкус.

Конзумирањето на лубеница е важно за сочувување на здравјето - содржи железо во иста количина колку и спанаќот, затоа е одлична против анемија. Стручњаците откриле дека освен доматите лубеницата е еден од најголемите извори на ликопен - природен црвен пигмент кој има големо антиоксидациско и антиканцерогено дејство. Ликопенот го подобрува помнењето, ги спречува срцевите заболувања и некои облици рак.

Лубеницата содржи и уште еден важен антиоксиданс - витаминот Ц, кој е важен за нормално функционирање на организмот а овозможува и подобра апсорпција на железото.

Обожавам лубеница... само да не е презреана...

• Во Тајланд и Индија лубеницата се меша со кари и се добива комплетно невообичаен вкус за нашиот македонски вкус;

• Во Мексико парче лубеница се прска со сол од лимета и чили наречен тахин, со кој се зајакнува слаткоста на овошјето;

• Во Италија врз лубеницата налеваат оцет балсамико и ја служат како предјадење. Исто така, парче лубеница го обвиткуваат со италијанска шунка како уште еден обид за слатко-солено јадење;

• Во Украина подготвуваат скиселена кора од лубеница. А знаат да направат и густ сируп од лубеница кој се поросува врз палачинки или сладолед;

• Во Намибија сокот од лубеница се ферментира и од него се добива вино и пиво;

• Во Мексико го прават и познатиот пијалок „Acqua Fresca de Sandia“ – ладна комбинација од лубеница, сок од лимета, шеќер и вода. .............

Лубеницата природно спакуван сок

Постои дилема кај народот - дали лубеницата е зеленчук или овошје, дали е тешка за стомакот и дали смеат да ја јадат дијабетичарите?
Лубеницата навистина е зеленчук, но се користи како овошје. Навистина содржи многу вода, околу 90 отсто, некогаш помалку, некогаш повеќе, што зависи од количеството шеќер што го има од 8 до 12 отсто, во делот што се јаде, без кората и семките. Покрај водата и шеќерот, се друго содржи во траги, помалку од 1 отсто белковини и влакна. Тоа, практично, би бил природно спакуван сок. Иако лубеницата е црвенкаста и значи дека има каротин, тоа е во многу мали количества и нема некое дејство.
Лековитото дејство на лубениците се гледа во плакнењето на бубрезите и бешиката. Добри се за освежување и за чистење на организмот - овозможува подобро растворање и излачување на токсините.

СОВЕТ

Лубеницата дејствува смирувачки, ги ублажува тешкотиите во варењето и добро им годи на оние кои имаат чир во желудникот. Во овие случаи има речиси исто лековито дејство како и грозјето. И покрај извонредното дејство на организмот, се смета дека е подобро лубеницата да се јаде повеќе пати но по малку, отколку одеднаш да се внесе поголемо количество. Максималното количество е 500 - 600 грама по оброк. Овој зеленчук не им годи на дијабетичарите, а треба да го избегнуваат и срцевите болни на кои им е забрането земање на поголеми количества течност. Разладените лубеници може да бидат штетни за лицата кои имаат чувствително грло.

Слатко од лубеници

За слатко се избира посебен вид на лубеница која има подебело бело месо (може и обична - дебелокорка). Средината и кората се отстрануваат, а белото месо се сече на коцки кои се ставаат во варова вода да отстојат преку ноќ. Утредента се ставаат во чиста вода, па отстојуваат уште еден ден, со менување на водата на два-три пати. Потоа, коцките се ставаат неколку пати во вода да зовријат. Добро се цедат и се боцкаат со игла. Во сируп од еден килограм шеќер проварен во 250 милилитри вода се варат околу еден килограм исчистени коцки од 15 до 20 минути, со постојано вадење на пената. При крај на варењето, се става сок од лимон и ванилин шеќер и тенџерето се вади од рингла. Откако слаткото ќе се излади, се сипа во тегли.