Мислам дека Музејот на ВМРО и на жртвите на комунизмот е врв на кичот и на невкусот, вели Петар Арсовски

Најавената изградба на Музеј на ВМРО и на жртвите на комунизмот во центарот на Скопје, во кој се предвидува во рамките на поставките да бидат изложени и 40 восочни фигури на избрани македонски историски личности, кај дел од уметниците и луѓето вработени во различни сегменти од културата, предизвикува различни реакции, но и јавно неодобрување и осуда.

За дел од нив идејата е неприфатлива поради трошење на пари во изградба на музеј со чисто политичка цел, што ќе биде надополнето и со трошоци за изработка на планираните восочни фигури за кои, само за изработка на една во познатиот лондонски музеј „Мадам Тисо“, ќе треба да се платат по 90. 000 евра.

Запрашани меѓу другото колку концептот на восочни фигури и на хиперреалстично, пикторескно отсликување на историјата кое обично е врзано со ентертејнмнет момент (на пример од типот на „Мадам Тисо“), одговара на намената на најавениот музеј, кој во основа треба да понуди една сериозна историска димензија, одговорија неколкумина. Но, реакциите го засегаат и прашањето дали на странците ќе сакаме да им покажеме само изолиран сегмент од нашата богата национална историја.

Дијана Томиќ - Радевска, ликовна уметница


- Треба да се внимава на начинот на презентирање на историјата. Доколку се одбере погрешен начин, тој би можел да делува несериозно, можеби и карикатурално Историјата на народот се гледа и се учи во склоп на националините музеи, каде се групира и презентира соживотот на еден народ и сокултурната историја. Постоечкиот наш Музеј на Македонија страда од неодржување на колекциите, од мало финансирање од страна на државата, од маркетиншка неатрактивност од една страна, а од друга, се трошат големи средства за нови идеи кои не се јасно конципирани , непрофесионално донесени, и за кои не се знае во која блиска, или далечна иднина би можеле да се реализираат.

Восочните фигури не се вистинскиот начин на презентирање на историјата, тоа е скап проект кој во основа е конципиран како атракција, каде што ќе може да видите, светски познати личности, личности од историјата како Черчил на пример. Маѓутоа, таму се среѓаваат и Мадона , Елвис Присли, Џек Мевосек, препознатливи личности кои влегуваат во групацијата на Мадам Тисо, само ако се доволно познати. Во некои нови идеи за културно претставување на градот, треба да се зголеми бројот на советници , потврдени со своите квалитети кои би можеле да дадат вистински придонес.

Петар Арсовски, актер:


- Изградбата на Музејот на ВМРО и на жртвите на комунизмот не е ништо ново туку продолжување на партиската политика на ВМРО ДПМНЕ. Истото се случуваше и во претходниот мандат на ВМРО кога изникнаа Плаошник, Самуиловата тврдина и катастрофалната реставрација на Камениот мост во Скопје кој е комплетно упропастен… Изградбата на Музејот на ВМРО е силно политички обоен проект кој одозгора на се', го узурпира плоштадот, надвор од урбанистичкиот план. Ако и постои идеја за музеј посветен на личностите од историјата, би бил склон да прифатам такво нешто ако веќе станува збор за застапеност на сите историски личности од Македонија, но не се согласувам тоа да бидат исклучиво луѓе од ВМРО.

Од друга страна, концептот на восочни фигури во еден музеј кој претендира да биде сериозна културна институција, а не туристичка атракција од типот на „Мадам Тисо“ е сериозна глупост. Како што е сериозна глупост поставувањето на статуите пред Владата, што навистина претставува една грдотија. Како не ни текнува дека некој отстрана го гледа тоа и не е тешко да донесе суд за тоа со какви глупости се занимаваме ние овде…

Јасно е дека културата се злоупотребува во партиски цели и мислам дека еден ваков музеј е врв на една таква политичка злоупотреба, врв на кичот и на невкусот. Ова е демонстрирање на сила. На крајот на краиштата, зарем никој не прашува нас? Зарем граѓаните не треба да се прашаат дали се согласуваат со она што ќе биде дел од јавниот простор? А што се случува сега, Владата донела одлука и тие ќе ги трошат нашите пари без никој притоа да не' праша нас за ништо!

Акад. Милан Ѓурчинов:

- Прва моја реакција во поглед на прашањето за изградба на еден ваков музеј е дека сосема е во ред да имаме и ние музеј од восочни фигури по примерот на светските метрополи. Во него да бидат поставени заслужни претставници од македонската историја, но не само од една страна! Да бидат претставени сите заслужни историски личности, да се избере врвното од сите страни, без внесување на политика и идеологија, односно без идеолошка матрица. Музејот да го содржи она што е најзаслужно за македонската историја од сите страни, од трите страни. Зошто, ние не сме без историја. Но, не треба еднострано да ја претставиме. Не треба на тоа да се приоѓа од моментална идеолошка матрица. Преку музејот светот ќе добие слика за Македонија, а тој, светот, треба да има вистинска претстава за нашата историја да не се создаваат забуни.

Мирко Стефановски, културен деец:


- Немам никакви конкретни информации околу тоа каква ќе биде потребата на музејот. Но, без оглед на тоа што секоја Влада може да прави приоритети во своите мандати, според мене како деец во областа на културата, овој музеј не спаѓа во апсолутните приоритети. Приоритети сега се концертна сала, театарска сала. Треба да се респектира и зборот на дејците во културата и да се почитуваат нивните желби. Ние како современици треба да оставиме наш, актуелен белег во животот. Секако дека треба да има место и за музеи, но тогаш кога за тоа ќе има простор и можности.

Перо Јосифовски, програмски директор на Музејот на Македонија


- Во музеологијата е дозволен секаков пристап во користењето на материјалите за изложбите. Не би требало да постојат одредени ограничувања во начинот на презентацциите. Бидејќи во овој музеј, најверојатно ќе бидат презентирани пишани материјали и фотографии, ќе биде добро, тој дел од историјата да се презентира и преку восочни фигури. Тие би ја разбиле монотнијата на презентирање, а бидејќи се работи за понов историски период, ќе биде потребна голема креативност за тој да и се доближи на публиката. Најтешко прапање сепак ќе бидсе изборот на личностите кои ќе бидат претставени преку восочните фигури. (К.Р.)

Наместо на руските, приоритет требаше да им се даде на македонските уметници - тие да заработат половина милион евра за уметничките слики во музејот на ВМРО.

Вакви се реакциите на македонските сликари, откако вчера беше обелоденето дека Министерството за култура ќе потроши нови петстотини илјади евра за уметнички слики што ќе ги изработуваат руски сликари, а ќе се најдат во музејскиот комплекс.

Секој од руските сликари ќе заработи од деветстотини илјади до 10 милиони денари.....

....

Во меѓувреме, музејот се гради. Се поставува столарија и гипс картони. Кон средината на идната година, граѓаните таму ќе ги видат восочните фигури на Тодор Александров, Мара Бунева, Ванчо Михајлов, портретите на македонските револуционери и огромни уметнички слики од македонската историја.

Сето ова, го чини буџетот околу 3 милиони евра. Но останатите трошоци, Министерството и натаму ги крие.

 

 

Браво....

Одличен избор на восочни фигури....Тодор, Мара и Ванчо....све мој до мојега....