На 31 Март во салата „Борис Трајковски” во Скопје, ќе ја имам честа да ја загреам публиката со 30 минутен настап пред концертот на 50 Cent.

Посебни подготовки пред настапот не правам. Всушност, мојата порака е: „Подобро да бидеш подготвен, отколку да се подготвуваш".

Тони Зен. Постојано свој и постојано прави нешто интересно за публиката. Ненаметлив во комуникацијата, а исклучително наметлив на сцената. Професионализмот е негов прекар, по кој го препознава публиката и новинарите.
Неодамна го објави третиот студиски албум „Во мој стил". Што е заедничко за него со претходните два, а по што се разликува од нив?

Точно така. Третиот албум „Во мој стил" беше промовиран на 10.12.2009. Истовремено го промовирав и спотот за насловната песна од албумот, која воедно е и носечка за овој проект. Заедничко за новиот и претходните два албума е фактот дека имам вложено многу труд и максимално сум внесен во работата. Различно или посебно за новиот албум е квалитетот на звукот, енергијата, зрелоста на текстовите и секако рапуванњето.

По радио станиците и телевизиите веќе се врти насловната нумера и спотот за „Во мој стил”. Како ќе тече понатамошната промоција на новиот албум?

Спотот е одамна пуштен и е доволно промовиран. Тој веќе застаре, хаха. Веќе снимив нов спот за песната „Не ме замарај", кој го изработи Дарко Антоновски (Community pictures). Во контекст на промоцијата на албумот, во план е снимање на уште неколку спота до почетокот на летниот период.

На 31-ви март ќе настапиш на концертот на светски познатиот хип-хоп артист 50 Cent. На што се должи твојот настап и со што ќе ја почестиш публиката?

Благодарение на „Авалон” продукција нашава нација ќе има чест во живо да го гледа и слуша еден од најголемите хип-хоп артисти 50 Cent. Јас ќе ја имам честа да ја загреам публиката со 30 минутен настап пред него. Се трудам постојано да бидам подготвен и константно да ја задоволувам публиката. И на настапот кој следува ќе се покажам во добро издание.

Како се подготвуваш за настапот, правиш ли некои посебни подготовки?

Како што кажав и претходно, постојано сакам да бидам подготвен, без разлика дали имам голем или мал настап. Значи посебни подготовки немам. Всушност, мојата порака е: „Подобро да бидеш подготвен, отколку да се подготвуваш".

Дали лично ти си фан на 50 Cent и која ти е омилена песна од него?

Без разлика дали јас сум му фан или не, 50 Cent е култен и премногу квалитетен артист во хип хоп индустријата. Неговата појава е многу моќна со самото тоа, тој влегува во категоријата најдобар. Затоа, не можам да одвојам една песна од него, бидејќи ја имам неговата дискографија преслушано и тешко е да се направи избор.

Сигурно ќе има некоја посебност во твојот настап. Само за читателите на ИДИВИДИ откриј некој детаљ?

Немам посебни изненадувања, хаха. Само за читателите на ИДИВИДИ ќе кажам дека и да имам некои изненадувања, не би било убаво да ги откривам. Знаат тие зошто, хаха.

Посебно забележлив беше твојот настап на концертот на Слаткаристика. Тој настан докажа дека рап музиката и хип хоп културата имаат голем број на следбеници во Македонија. Кој е твојот коментар за публиката и нејзините реакции?

Факт е дека до сега не се случило излегување на сцена со „хамер" на нашиве простори, но и пошироко. Не сум тип кој се „лупа у груди“ заради тоа. Тие работи всушност се составен дел од целото шоу. Знам дека се случи спектакл, но ние не остануваме само на тоа. Не сакам да се фалам, да мирувам и живеам на стара слава. Постојано работиме и се трудиме да ја задоволиме публиката, бидејќи ние работиме за публиката, па можеби и затоа ја имаме во голем број. Колку вложуваш толку и ти се враќа. Ние премногу вложуваме и затоа може да се пофалиме дека сме доживеале убави моменти кои ќе останат засекогаш во сеќавање.

Кој или што те инспирира при креирањето на музиката?

Доволен ми е животот во кој имам искусено многу важни работи. Ме инспирира и општеството кое не опкружува, а и информациите кои ги примаме од светот претставуваат најголема инспирација за еден хип-хоп артист.

Која е твоја неостварена желба во кариерата?

До сега ми се оствариле неколку желби во кариерата и на пат сум и другите да ги остварам. Мојот живот е мисловна проекција и во таа димензија желбите се остваруваат. Потребно е само да се придржуваш кон сонот со верба, трпение и волја.

Каков тип на музика приватно слушаш, омилени изведувачи од Македонија и глобално?

Секогаш ги одвојувам The Roots кога ми поставуваат вакво прашање. Сметам дека сум се изнаслушал музика и среќен сум што можам да препознам квалитет. Низ моите уши поминал секаков вид на музика, но сум се одлучил за еден правец кој ќе ми биде приоритетен, а тоа е хип-хоп музиката. Како слушател, дома, кога возам или некое друго место, сакам да го слушам сето она што ќе ги задоволи моите критериуми и моите ушни тапанчиња без разлика на музичкиот правец.

Македонските дами на хип-хопот на интернационална компилација

"Обединети жени на универзумот" (Унитед Њоман Оф Тхе Универсе) е нова хип-хоп компилација составена од женски ЕмСи-ја која може бесплатно да се симне од веб-сајтот њњњ.хипхопмацедониа.цом. Се работи за интернационална компилација на која се наоѓаат артисти од 6 земји: САД, Бахами, Франција, Индонезија, Србија и Македонија. Цедето е работено овие неколку месеци и е компилирано од македонските артисти Слит и Б.И.Г. Грл, со надеж дека ќе ја охрабрат и ќе ја разбудат женската хип-хоп популација кај нас.
Од 15-те песни колку што има на компилацијата, македонските дами се застапени со две. Првата за Биг Е и е насловена "Првиот шамар", а хип-хоп збирката ја затвора "Оган на суетата", заедничка трака на Првата Дама, Б.И.Г. Грл и Слит.

Балкански хип- хоп фестивал во Скопје

"Балкан хип-хоп и ар-ен-би фестивал" ќе се одржи во сабота на 6 февруари , во Метрополис Арената. Организаторите најавуваат забава од 21 часот до рано наутро со познати балкански хип-хоп и ар-ен-би изведувачи.
Меѓу нив е босанската рап ѕвезда Едо Маајка, и составот "Конект" од Хрватска. Раперите Гру, Струка, Цвија, Марчело, Ана Масуловиќ и Луд доаѓаат од Србија. Од Бугарија гостува составот "Упсурт" со сексапилната пејачка Лора Караџова. Како домашна подршка ќе настапат САФ и "Токсикологија" .
Резидент диџеи ќе бидат Гоце од САФ и англискиот диџеј Плаја кој настапувал пред "50 сент", Ријана и Џенифер Лопез. Билетите до 5 февруари чинат 390 денари, а на денот на фестивалот на билетарата на Метроплис Арената- 490 денари. (М.Џ.)