Доколку не уследи жалба на донесеното решение до повисоките судски инстанции, Иснифарис Џемаили ќе остане сопственик на парите кои со судска одлука му беа исплатени пред неколку години

Ете така!

ПРИВЕДЕНИ 19 Лица ЗА „БАЧИЛО“ И ЗА НЕЛЕГАЛНА ДЕНАЦИОНАЛИЗАЦИЈА

Се бара „мозокот“ на аферата вредна  5 милиони евра

Неколкумина од приведените се понудиле да бидат заштитени сведоци

Деветнаесет лица, меѓу кои судии, директори, адвокати, нотари, поранешни членови на второстепени комисии и овчарот Иснифарис Џемаили, вчера рано изутрината биле приведени во полициска станица и пред истражните органи. Приведените се осомничени за перење пари, за злоупотреба на службената положба и за измама. Кривичните дела се поврзани со аферата „Бачило“ и со нелегална денационализација на земјиште.

Осомничени се 23 луѓе, а за 19 од нив бил даден налог за приведување. Приведените Иснифарис Џемаили, Ордан Миланоски, Гроздана Манасиевска, Душан Стојанов вчера околу пладне дале изјава пред истражните органи.

Пензионерот Ордан Миланоски бил полномошник за отуѓување триесетина парцели имот.

Тие со денационализација им биле доделени на петмина наследници, кои го заложиле имотот под хипотека за заем што не го вратиле, па сопственик на имотот станале Гроздана Манасиевска и Томислав Трајковски. Најголем дел од имотот на истиот начин подоцна и' припаднал на Светлана Симоновска, која е меѓу приведените. Таа добила и парцела од 1.200 квадрати, спроти Соборниот храм во Скопје. Во сите договори полномошник бил пензионерот Миланоски. Меѓу приведените се и нотарите Никола Стојменовиќ, замешан во случајот „Бачило“, и Гордана Ракочевиќ, чиј сопруг Владимир му е адвокат на овчарот Иснифарис Џемаили, кој доби оштета од 727 илјади евра за тој случај. Во април, пред Основниот суд 1 да донесе одлука за замрзнување на неговиот имот, Џемаили склучил договори за заем и го дал под хипотека речиси целиот имот, со исклучок на неколку ниви. Приведена е и адвокатката Ленче Димчевска, која од антикорупциската комисија беше обвинета дека незаконски го ополномоштила Миланоски да застапува странки во денационализацијата, иако не бил адвокат ниту имал правно образование. Извршителката Емилија Алексоска, која во тоа време била раководителка на Секторот за премер и катастар, се сомничи дека извршила промени во обработен предмет и дека вршела притисок врз својата службеничка да го заврши предметот. Приведен е и Томислав Трајковски, кој преку фиктивен заем од 59.000 евра станал сопственик на четири парцели најквалитетно градежно земјиште во централното градско подрачје, со вкупна површина од 5.672 квадрати.

Осомничен е и Саша Андоновски, претседател на тогашната второстепената комисија за денационализација. Тој не е достапен за полицијата. Дознаваме дека е во странство.

Според МВР, нема случај „Бачило“, туку станува збор за метод што се користел за да се извлечат пари од државата. Делото го извршиле со фиктивни договори и задолжувања со купување градежно земјиште. Околу 200.000 евра од 760.000 евра државни пари што на име штета биле земени од државата му биле исплатени на Иснифарис Џемаили. Преостанатиот дел бил одлеан во аферата денационализација. Полицијата го следела движењето на парите и утврдила дека со фиктивни договори кај одредено лице се задолжувале други лица, а сопствениот имот го давале како залог. Бидејќи не можеле да си ги вратат парите, се активирал залогот. Пазарната вредност на вака одземеното земјиште се проценува на пет милиони евра. Министерството за внатрешни работи утврдило дека методот на малверзација со хипотекарни договори бил користен во уште два други случаја, но полицијата во интерес на истрагата не соопштува детали. МВР не го открива ниту името на банката што се јавува во сите случи со хипотекарните измами. Неколкумина од приведените се понудиле да се јават како заштитни сведоци и ако се искомбинираат нивните изјави, заедно со доказите, ќе се открие и „мозокот“ на овие малверзации, велат во МВР.